Mahni awmna tura awm lo zirtirtute

Mizo Students’ Union (MSU) General Headquaters hruaitute chuan July 14, 2026 khan Education Minister a pisaah an hmu a, zirtirtu mahni post-a awm lote leh zirtirtu nungchang ṭha lote chungchang an thlen.

MSU hruaitute sawi danin, Samagra Shiksha hnuaia zirtirtu mi 550 zinga 246 (44.73%) chu post-a awm lo an ni. Mamit district bikah zirtirtu mahni awmna hmun tur (post)-a awm lo mi 150 an awm thu an sawi bawk.

MSU-in Education Minister hnena an thlen, Samagra Shik-sha hnuaia zirtirtu zingah a zatve hnaih thuak an awmna tur (post)-a an awm loh thu an sawi hi a dik turah ngai ila; a zialo tak zet a ni.

Hetianga zirtirtu mahni post-a awm lote vang hian sikul tam takah zirtirtu indaih lohna a awm ngeiin a rinawm a, naupang zirna a nghawng ngei a rinawm. Sorkar hnathawk, mahni post-a awm ṭha duh lote hi an ngeiawm a, zirtirtu an nih phei chuan Mizoram zirna, a bikin sorkar sikula zirna tiṭhanthutu an ni hial ang.

Sorkar hnathawk aikal lak sorkarin titawp thawkhat tawh a, pisa kai hun pawh dik vek lo mah se, tun hma ngaihtuah chuan a ziaawm ta viau. Chutiang a nih laia Samagra Shiksha hnuaia thawk zirtirtu zinga a zatve hnaih thuak mahni awmna tura awm lo an la awm hi ṭha lo tak zet a, a mak zawk hle.

MSU thu thlen hi sorkar hian a bawhzui a, a enfiah ngei a ngai a, a dik leh dik loh finfiah a ṭul. Mahni post-a awm lote chu an awmna tur dik tak, dah an nihnaah awm ngei turin khauh takin a hriattir tur a ni a, thu awih lo zui zelte chu a hrem ngam tur a ni. Chutianga sorkarin hma a la lo a nih chuan hun kal zel turah harsatna awm zel ngei dawn a; Mizoram zirnain hma a sâwn tur angin hma a sawn theih loh phah ngei ang.

Sorkar hian a hnathawkte hi a vil ṭha tur a ni a, an awmna turah an awm leh awm loh te, hna an thawh ṭhat leh ṭhat lohte uluk leh fîr zawkin a enfiah a ngai a ni.