Official-te'n vei lehzual rawh se

Central YMA hruaitute chuan July 14, 2026-a MJA member-te nen an inkawmnaah, SIR 2026 neih mekah, Draft Electoral Roll-a chuang voter 32,163 chu SIR 2005-a zawmpui nei lo an nih thu an sawi. Mizoram khawthlang lamah thil rinhlelhawm tak tak a awm avangin a ṭul anga hma an lak dawn thu an sawi bawk.

CYMA hruaitute sawi danin, SIR 2026 Draft Roll-a chuang voter 8,28,906 zinga 3,56,782 chu SIR 2005-a awm tawh an nih laiin, mi 9,39,961 chu SIR 2005-a la awm lo a, mahse, thlahtute aṭanga Mizoram awm tawh, zawmpui nei an ni; mi 32,163 erawh chu SIR 2005-a la awm lo leh thlahtu zawmpui nei lo an ni thung.

SIR 2026 Draft Roll-ah voter 32,163 lai SIR 2005 zawmpui nei lo an awm hi a ngaihṭhatthlak loh hle; anmahni leh an thlahtute bakah, Mizorama an awm dan an uluk taka chhui ngei ni rawh se. Chu ai maha ngaihṭhatthlak loh chu–Mizoram khawtlang lam, Bangladesh hnaiha khaw tam takah voter nasa taka an pun laia SIR 2005-ah zawmpui nei anga dah luh vek an ni hi a ni a; hei hi tih tak zeta vei a ṭul.

Electoral roll ennawnnaa official hrang hrang–CEO leh Joint CEO aṭanga BLO te hian Mizoram khawtlang lama voter pung chak lutuk hi tun ai hian vei lehzual rawh se; chu chu Mizoram mipuiin an laka an beisei a ni.

Document an neih avang ngawta dan theihna nei loa inngai nghal mai loin, document-te chu a dik leh dik loh te uluk leh fimkhur zawkin enfiah nawn ṭhin se. Hmun ṭhenkhata BLO-te'n thil dik tâwk lo an ti duh thei a, dik lo taka thil tite an lo thurualpui thei bawk; chungte chu AERO, ERO leh CEO pisa lam thlengin a hmunah ngei endikin finfiah ṭhin se a ṭha hle ang.

Mizo hnam leh kan ram himna tur hian mawhphurhna kan nei ṭheuh. SIR 2026 buaipuitute bikah, mahni tih tur chin hlen ringawt hi ram leh hnam himna turin a tâwk zo lo thei a, ram leh hnamin a tuar thei. Electoral roll ennawnnaah pawh hian mawhphurhtu hrang hrangte hian ṭha pangngai taka an hlennaah hian duhtâwk mai loin, ram leh hnam hmangaihna tak tak rilru nen nasa lehzuala ṭan an lak a ngai e.