Ram buai chinfel dan ṭha

Chawnpui venga mimal rama mi dangin in an sak pathum chu July 13, 2026 khan court thupek avangin magistrate leh police-te kaihhruaina hnuaiah khawl hmanga nawr chhiat a ni.

Media-a tarlan danin, Chawnpuia mi ramah mi dangin in an sak avangin ram neitu court-ah a zualko a, court chuan ram neitu chu thiam chantirin, July 2, 2026 khan mi rama in sakte tihchhiatna tur thupek a chhuah. Court order angin, sorkar hotute kaihhruaina hnuaiah July 13 khan in pathum nawr chhiat a ni ta a ni.

Mizoramah kawngpui zauh dawn vanga ram laka zangnadawmna pek tawh, in chhuahsan lo leh ṭhiah mai loh vanga sorkarin in a ṭhiahsak a awm nual tawh a; mi rama in sak vanga in ṭhiahsak erawh hriat tur a la awm lo viau.

Tun hnaia Chawnpui venga mi rama mi dangin in sakte ṭhiahsak a ni hian mipui beng a verh a, sawi zui a hlawh hle. Social media lamah pawh post hrang hrangah comment a tam tlang viau a; mi tam takin ṭha an tih thu an sawi laiin, in neitute khawngaihtu mi eng emaw zat an awm bawk.

Mizoramah hian ram neitu nih inchuh vang te, ramri sawn vang leh chhan dang dang vanga ramri buai a awm fo a; mi ram neihsak tum ngar ngar pawh an awm nual mai thei. Mahni ram chin hum tur chuan patling nutling an ṭang na tlangpui a, buaina neuh neuh a awm ṭhin.

Ram chung-changa buainate hi tharuma chinfel chi a ni lo a, tharuma chinfel tum a nih chuan buaina lian zawk leh thui zawk a chhuak thei; dan anga chinfel tum zel a ṭha ber. Chawnpui venga in tihchhiat tak hmun chungchanga buaina court-a thlen pawh hi thil finthlak niin a lang.

Ram buai chhan lian tak pakhat chu duhâm vang a ni fo a, duhâmna hian buaina a thlen ṭhin. Chuvangin, Mizo Kristiante hi buaina leh harsatna pumpelh turin duhâm bik nih loh a pawimawh.

Dan bawhchhiat tamna ram a nuam ngai lo a, dan lalna ram apiang a nuam ṭhin; kan ramah hian dan hi lal se, mi hausa leh rethei, milian leh hnuaihnungte thliarna awm loin dan anga hmalaka thil tih zel ni se a ṭha.