Kawlphetha tihtawp leh a chhan
Power & Electricity department hotute an Minister hoa July 10, 2026-a ṭhukhawm chuan Aizawla kawlphetha tihchangtlun dan tur an ngaihtuahnaah, chhan hrang hrang vanga Inrinnia kawlphetha tihtawp (shutdown) ṭhin tihtlem an rêl. 33 kV ring line hmanga Aizawl khawpui veh chhuah vek a nih theih dan tur leh, mipuiin kawlphetha ṭha zawka an hmuh theih dan tur hrang hrang an rêl bawk.
Aizawlah hian khawpui pumpui huap emaw, hmun ṭhenkhat lai huam emawin Inrinniah kawlphetha tihtawp a ni fo a, khawpui dang leh district dangah pawh a ni ve tho ang. Hei vang hian Inrinni hi 'current awm loh ni' tia sawi fiamthu a ni hial.
Tun hma lamah chuan power supply hi êng atan hman a ni ber a, hna thawhna atana hmang an tam lutuk lo. Tunah erawh chuan kawlphetha tel loa hna thawh theih loh a tam em em tawh a, harsatna pawh thleng thei pawh a tam tawh, Chuvangin, kawlphetha pawimawhna leh mamawhna a sang zual zel a ni.
Aizawl leh Mizoram hmun ṭhenkhata kawlphetha lâkna leh semna hmanrua, khawl leh bungraw chi hrang hrang zinga eng emaw zat chu hlui tawh tak tak a nia sawi a ni a, rim taka hman a ni hlawm bawk.
Power supply atana hman khâwl leh bungraw hrang hrangte a hlui tawh avangin a thara thlak ngai tam tak a awm tawh a, a theih ang angin thlak mek zel a ni bawka sawi a ni.
Inrinni-ah a ni emaw, ni dangah emaw pawh ni se, Power & Electricity department hotute hian awmze nei lo leh mâwlmang takin kawlphetha an titawp ngawt lo ang tih a rin theih a; mipuiin kawlphetha an hmuh loha hrehawm ti ber chu PE department-a thawkte an ni hial ang. Chuvangin, kawlphetha 'off' a nih avanga sorkar emaw, department emaw dem vak hi ṭul lo leh sâwtna awm lo a ni thei a, inhriatthiam ve a ngai.
Chutihrualin, inthlahdah leh dâwngdah vang liau liaua kawlphetha peknaa a nih dan tur ni lo te, kawlphetha awm lote erawh awm thei a ni. Power & Electricity department hotute leh thawktute'n fimkhur taka thil an tih a ngai a, ṭul lutuk lo leh pumpelh theihah chuan kawlphetha titawpa mipui tana harsatna siam lo turin an lak lehzual a ṭul a ni.