Damdawi-in milin indâwr zel se
Mizoram State Health Care Society hotute chuan July 2, 2026-a journalist-te tana Mizoram Universal Healthcare Scheme chungchang an zirtirnaah, Mizorama damdawi-inte leh phai lama damdawi-inte chu inenkawlna man (rate)-ah khaikhin a remchan loh thu an sawi. "Hospital quality a inang lo, facility an neih leh speciality a inang lo," an ti.
Mizorama mimal damdawi-inte dinhmun a inang lo. Chhung lam leh páwn lam lan dan, faina leh thianghlimna, hmanraw neihte a inang lo a; hmanraw changkang, man to tak tak nei an awm laiin, la changtlung lo deuhte pawh an awm. Doctor thiamna a inang vek lo a, mipuiin an duh pawh a inang lo a, service an pek pawh a inang lo.
Mimal damdawi-inte hian sum an sên leh service an pek azirin rate an bithliahin a rinawm a, an rate pawh a inang lo hlawm. Chutiang bawkin Mizoram chhung leh páwna damdawi-inte rate a inang lo. MSHCS hotute'n Mizorama mimal damdawi-inte leh phai lama damdawi-inte rate khaikhin a remchan loh thu an sawi hi thil nihna dik tak a ni.
Phai lama inenkawl a ngaih ṭhin chhan hi Mizorama enkawl theih a nih loh vang te, doctor ṭha zawk an awm vang te, hmanrua an neih ṭhat zawk vangte a ni tlangpui. Hei vang hian phai lama damdawi-in, Mizoram sorkarin damlote a thawnna ṭhinte hi chu Mizorama damdawi-inte ai chuan ṭha zawk tura ngaih a ni; ṭha zawk na nâ nâ chu inenkawl man pawh a to zawk ngei ang.
Mizorama damdawi-in zingah changkang leh ṭha tak tak a awm ve tawh a; fai leh thianghlimna, service pek, hmanrua leh thil dangah ṭha tak tak an awm ve tawh - hmasawnna tur erawh tam tak a la awm.
Mizorama private hospital-te'n phai lama damdawi-in ṭha zawkte nen an inkhaikhin a rem lohna chin a awm a; chu chu hre chungin sorkar an dawr a ngai. Sorkar tan pawh, Mizoram a nih avanga hniam lutuka kan private hospital-te an dàwr bik tur a ni lo. Damdawi-inte ṭhatna, thiamna leh theihna mila indàwrin, MUHCS zawm turin inremna siam thei se a duhawm.
Kan private hospital-te'n phai lam damdawi-in ṭhate an la tluk lo a nih pawhin, damdawi-in dinhmun leh service an pek mil tâwkin rate chungchangah uluk zawkin sorkar lamin ngaihtuahna sêng thar teh se.