NH laih zauh ngawrh taka vil ni se
Kolasib District Level Monitoring Committee hotute an Chairman hoa July 8, 2026-a ṭhukhawm chuan, National Highway no. 306 leh no. 6 kawngpui thlûr lia siam turah, Vairengte-Mualkhang inkar kawng (Package 3-7) huam china leivûng paihna tur Muck Disposal Plan chungchang an rêl.
Muck Disposal Plan hmang hian kawng laihna leivûng paihna hmun tur eng emaw zat duan a ni a; leivûng paihna tura hmun thlan zinga ṭhenkhat chu an pawm tawh laiin, hmun ṭhenkhat chu enfiah leh turin meeting chuan an dah.
Ṭhutkhawmah hian VC aiawhte chuan, contractor-te'n fimkhur lo taka leivûng an paih avangin harsatna an tawh ṭhin thu an sawi. Kolasib Bawrhsap chuan, contractor-te chu fimkhur taka hna thawk tur leh Muck Disposal Plan anga hmun ruatah ngei leivûng paih turin a hrilh.
Tun hnai kum eng emaw ti kal ta aṭang khan Mizoram hmun hrang hrangah kawngpui zauh a ni a, hmun tam takah kawng siam zawh a ni tawh. Kawng laih zauhnaah hian kawng siamtute'n leivûngte kawng thlang lamah an nawr liam nasa hle a, chu chuan mihring leh nungchate tan harsatna nasa tak a thlen. Mi tam takin an sawisel bakah, an dodal tawh ṭhin a; mahse, a sâwt mawh hle.
NH kawng laihna leh siamna tura sum ruahmanah leivûng paihna tur bik sum ruahman a nih thu sawi a ni ṭhin. Chutihlaiin, kawng laitute'n hlêp tam an duh avangin leivûng paihna bikah paih ṭha duh loin, kawng thlang lamah an hnâwl liam mai ṭhina sawi a ni bawk.
Mizoram hmun hrang hranga NH-te zauh leh siamnaah kawng siamtute'n leivûngte kawng thlang lamah an paih nasat avang leh, chu'ng chuan harsatna a thlen ṭhin avangin, NH-306 & 6 zauh turah hi chuan dan ang taka leivûng paih a ni theih nan ṭan lak a, uluk taka vil a ṭul dawn a ni.
NH-306 & 6 zauh mekah hian leivûngte a paihna hmun turah chauh paih a ni theih nan uluk taka vil ni se; chumi tur chuan Kolasib District Level Monitoring Committee hian mawh lain, ṭha takin vil zui se, a ṭha hle ang - an tih âwm tak pawh a ni. Kawng laihna bul hnaia khawtlang hruaitu - VC, YMA leh pawl dangte pawhin sorkara thuneitute vilpui thei se a duhawm.