Ram humhalh leh thupek bawhzui

Commerce & Industries Department Director chuan tun hnai khan thupek a chhuah a; industrial area-a hmun khuarte leh chênna atana hmangte chu July 31, 2026 aia tlai loah industrial area/estate chhuahsan turin a hriattir.

Sorkarin Aizawl leh a hnaivaiah industrial area pathum - Lengtea Export Promotion Industrial Park, Luangmuala Industrial Growth Centre leh Zuangtuia Industrial Estate a nei. Hengah hian sorkar aṭanga phalna nei loa hmun lo khuar leh chênna atana hmang mi eng emaw zat an awm thu tarlan a ni.

Commerce & Industries Director chuan, department ram (land lease) chhungah revenue pass siam thar theih a ni lo a, ram zuar an awm pawhin dan phal loh a nih thu a tarlang bawk.

Aizawl leh a chhehvelah hian 'risk mual' tia sawi a awm nual a, khawpui dangah pawh a awm mai thei. 'Risk mual' tih ṭawngkam hi a lâr phian a, dan anga ram nei ni lo, ram àwl nia hriatah invalh a, in sa a, taneih zui ta tihna a ni ber àwm e. Hetiang hian sorkar tan harsatna tam tak a thlen ṭhin.

Sorkar ram, industry dinna tur hmun bik ruahmanah pawh mimal, chhungkuaa khawsa tam tak an awm a, mi ṭhenkhat chuan an awmna hmun chu an ta angah an ngai tawh nia sawi a ni a, ṭhenkhat chuan an hralh chhâwng hiala sawi a ni.

Hetianga sorkar rama mimal an invalh chhan lian ber chu - sorkar inthlahdah vang leh dâwih vang a nih a rinawm. Thuneitute'n mipuite voter ang ringawta en vang leh vote hloh hlauh vang te, ram leh hnam ṭhatna tur aia mimal hamṭhatna tur ngaihtuah zawk vang te, sorkara thuneitute hlemhlêtna vang te pawh a ni thei ang.

Sorkarin industry dinna atana hmun a ruahmante hi sorkar hian huaisen taka a humhalh a ṭul. Tuna Commerce & Industries Director-in thupek a chhuah pawh hi a takin, khauh takin bawhzui ngei rawh se.

Thupek a taka bawhzui a nih loh a, chhuak tura tihte an chhuah loh a, sorkarin engtin mah ti loa a enliam leh mai si a nih chuan thupek awmze nei lo a ni dawn. Chuti a nih chuan sorkar hlauh lohna a lian sauh ang a, hun lo kal zel turah sorkar tan harsatna leh phurrit lian zawk a thlen thei dawn a ni.