Fûrpui - fimkhur zual hun a ni

Fûrpui tak tak kan thleng a, tun hnaiah Mizoramah ruah a sûr nasa. Kum tina fûr laia kan hriat ṭhin chu leimin, kawng ping leh tuilian a ni; chu'ng chu Mizorama hmun eng emaw zatah a thleng mek.

Tun hnaia ruahsur vanga Aizawla chhiatna lamhawi thleng langsar tak chu Ngaizèla lung tla leh Chanmari-Ramhlun inkar Laldenga Road-a lung tla a ni. Kawng pahnihte hi eng lai pawha lirthei leh mihringin an paltlang a ni chungin, mihring thi leh hliam an awm lo a, a lawmawm.

Mizoram chhim lamah, NH-54 chu Bualte daia leimin nasa tak vangin a ping a, lirthei leh mi eng emaw zat an táng. Tangkhangte tan Bualte khawtlangin chaw an buatsaih a, he chêt dan mawi tak hi tangkhangte mai ni lo, Mizoram tan a lawmawm a, hriat a nuam hle. Khaw dangte pawhin an theih ang angin an ṭanpui ngeiin a rinawm a, a lawmawm vek mai.

Fûrpui a nih angin hun eng emaw chen chu ruahtui a la tam zelin a rinawm. Fûr laiin chhiatna a thlen duh bik avangin mi tin kan fimkhur zual a ṭul hun a ni a, fimkhurna tur chi hrang hrang a awm. Chhung tinin mahni in leh a velte kan phâk ang tâwkin uluk taka kan enfiah a ṭul a, enfiah nacháng i hria ang u.

In chhung leh in chung aṭanga tui chhuak kal zel danah fimkhur a ngai. Kan in aṭanga tui chhuakte kal zelna tur uluk leh ṭha taka siam a ṭha. Kan ram chinah a ṭha thei ang berin tui luanna siam ṭheuh ni se, kan ṭhenawm leh kan thlanga mite tana him lo thei a nih loh nan siam a pawimawh.

Lei laih dana fimkhur loh vanga chhiatna thleng Mizoramah a awm nual tawh a, mi tam takin an thih phah tawh. Hun kal tawha chhiatna thleng leh chhiatna thlen chhante hi inzir fin nan kan hman a hun tawh ta zet.

In sakna tur leh thil dang atana lei laihah tun aia kan fimkhur lehzual a ngai a, mi tin i fimkhur teh ang u. Fimkhurna hmangin eng emaw chen chu chhiatna a pumpelh theih tih kan hriat a ṭha e.