SIR 2005-a zawmpui nei lote

Election Commission of India-a inziak lut Mizorama political party panga aiawhte July 7, 2026-a Aizawla inhmukhawm chuan SIR 2026 chungchang an ngaihtuah a; SIR 2026 Draft Roll chhuakah, electoral roll 2025-a chuang si, 2005 electoral roll-a zawmpui nei lo, 'No linkage with last SIR' category-a chhinchhiahna sena awmte chu paih vek ṭha an tih thu an puang.

Central YMA hruaitute chuan, SIR Draft Roll an zir chiannaah, polling booth tinah SIR 2005-a zawmpui nei lo 'No linkage with last SIR' tih a sena chhinchhiah a awm vek thu leh, Mizoram khawthlang lamah a tam zual thu an sawi.

SIR 2026 hi a hmaa SIR hnuhnung ber 2005 behchhana tih a ni a; SIR 2005-a la awm hman lote chu an nu leh pa emaw, an pi leh pute emaw nen enmil a ni. Enmil tur awm lo, electoral roll 2025-a chuangte chu SIR Draft Roll-ah chhinchhiah bik an ni.

Mizoram electoral roll-a chuang tawh, SIR 2005-a zawmpui nei lote hi a chhan chi hrang hrang a awm thei; ṭhenkhat chu India khua leh tui dik tak ni lo, dan loa thun luh an nih rinna a lian hlein a lang. Mizoram khawtlang lamah SIR 2005-a zawmpui nei lo an tam zual hian mi tam tak ngaih a ti ṭha lo zual.

Mizoram electoral roll-a chuang tawh, SIR 2005-a zawmpui nei lote hi uluk taka en zui ngei chi a ni. Mizoram khawtlangah Bangladesh aṭanga dan loa rawn lut ru an tam nia sawi a nih fo avangin, uluk leh fimkhur lehzuala enfiah ngei ni rawh se.

SIR 2026 neih mekah tunah hian electoral roll-a thun thar duh tan dil theih a ni a, roll-a awm sa, dik lo taka awm nia hriatte paih dil theih a ni bawk. Hei vang hian tuna electoral roll ennawn mek hi a pawimawh em em a, kawng tinrêngah fimkhur a ngai.

SIR 2005-a zawmpui nei lote zinga tam tak chu paih àwm tak a ni mai thei a, chutihrualin, political party-te duh dan anga an zavaia paih nghal vek erawh a ṭha lo thei. Chhungkua leh thlahtu lama bùl tak, India/Mizoram mi dik tak ni si awm theih a ni a, chuvangin, uluk taka zir chian hmasak a ṭul ang.