Mahni hna rinawm taka thawh

Mihring nunah hian infak leh inchawimawi hi mi dangah thil ṭha leh duhawm tak a thlen theih rualin, a ṭha vek lo thei. Sawiselna hi ngeiawm deuh mah se, a ṭhatna lai a awm thei a, mi siamṭhatu a ni thei a; a lehlamah mi tichhetu a ni thei bawk. Insawichhiat erawh hi chu, engtin emaw tak ṭhatna a nei a nih pawhin, a nghawng chhe lam a tam zawk fêin a rinawm.

Mizote hi hmânlai chuan eizawnna a inang hlawm a, loneih a ni deuh vek mai. Tunah erawh chuan hna chi hrang hrang a tam ta hle a, Mizote'n hna kan thawh chi hrang hrangte hi sawi sên pawh a ni tawh lo.

Chung hna hrang hrangte chuan nihphung a nei a, hna thawh dan a inang lo a, thawh hun pawh a inang lo. Hna hrang hrangte hian ken tel tam tak a nei vek a, chungte chu inang lo tak takte a ni.

Doctor leh nurse te hi damlo enkawltu, damlote tihdam rawngbawl hna thawk an ni a, an hna chuan ken tel tam tak a nei - chhun leh zan a sawi hleih theih loh ang. Chutiang bawkin police, zirtirtu, dan hmanga roreltu (judge), chanchinbumi, tuisem, lirthei khalhtu leh hna dang zawng zawng pawhin nihphung leh thawh dan kalhmang hran vek an nei.

Hna hrang hrangin a ken tel - kalphung, thawh dan, thawh hunbi leh a dangte hi a thawktuin a hre chiang tur a ni a, a pawm thlap tur a ni bawk. Hna thawktu zawng zawng hi kan hna ṭheuh kan thawh hmaa kan hna tur nihphung hre hmasa a, hnain a ken telte huama lut deuh vek kan nih a rinawm.

Mahni hna ṭheuh ṭha tak leh rinawm taka thawh hi a hlu ber a, chu chu mi tinin kan tum tur a ni. Ṭha taka kan thawh avanga mi fak beisei kher loh erawh a ṭha a, hna chi dang thawkte aia thawk ṭha bik viaua inngaih tur pawh a ni lo ang.

Miin a hna ṭha taka a thawh hian a lawmawm a, infaka inchawimawi thiam a ṭha a; mi tiphurtu, ṭhahnemngai lehzuala thawhtirtu a ni thei. Chutihrualin, mi dang, hna dang thawkte aia thawk ṭha ta bik viau anga sawi chiam erawh a ṭha kher lo thei bawk.