Dawrte endik chhunzawm zel ni se

Legal Metrology enforcement chuan June 18-19, 2026 khan Aizawla dawr ṭhenkhatah an endik a; dawr 13-ah maximum retail price (MRP) aia sanga tui (mineral water) zawrh hmu chhuakin, tui ûm 672 an man. Legal Metrology (Packaged Commodities) Rules, 2011 Rule 18(2) hmanga hrem turin hma an la a ni.

Thil fûn (packaged item) rêng rêng MRP aia toa hralh phal a nih loh thu tarlangin Legal Metrology chuan, MRP aia sanga thil hralh ṭhin hriate chu Legal Metrology pisa hrang hrangah hriattir zel turin mipui an chah nghal.

Legal Metrology mite'n Aizawla dawrte'n dan an zawm leh zawm loh an endik hi mipui hmakhua ngaih vang niin a hriat a, a lawmawm. Chutihlaiin, dawrkai zingah dan zâwm lo, thil man bituk aia sanga zuar an awm nual an awm hi a zialo hle.

Dawr hrang hrang Legal Metrology-te'n an endik hi anmahni emaw, department emaw, sorkar emaw hlâwkna atana an tih a nih a rinawm loh a, mipui hlâwkna leh hamṭhatna tur an ngaihtuah vang a nih ngei a rinawm. Mipui, a bik takin mi rethei zawkte tan a lawmawm em em.

Legal Metrology-in MRP aia sanga bungrua zuarte tun hnaia an man chhuahna hi dawr 13 a ni a, a tam lêm lo. An endik loh zingah MRP aia sanga thil zuar leh hralh ṭhin dawr tam tak an awmin a rinawm.

Dawrkaiah MRP aia toa thil zawrh a tam thu sawi a awm fo mai a; Legal Metrology hian ngawrh lehzualin dawr hrang hrang an endik zel a ṭul hle tih a lang. Aizawl leh khaw dangah pawh, dawr hrang hrangte zing zawka endik turin han ṭang sauh sauh teh se.

Zing zawka dawrte endik turin Legal Metrology hi thawktu an indaih lo viau mai thei a; an indaih zawk dan tur sorkarin a ngaihtuah a ṭulin a rinawm a, a tihchak lehzual a ṭul ang.

Legal Metrology-ah hian indaih deuh pawh ni se, dâwr zawng zawng an endik sêng dawn lo. Thuneitute'n an endik emaw, endik lo emaw, sumdawngte'n dan an zawm ṭhat a, an thil zawrhte dan ang taka an hralh hi a pawimawh lai a ni. MRP aia toa thil hralh hi mipui sum eirûkna chi khat a ni tih sumdawngte hian hre mawlh rawh se.