MizoTaxi leh lirthei hman man

Mizoram Taxi Association, Aizawl Two Wheeler Taxi Association leh Aizawl District Auto Rickshaw Owners Association te chu June 19, 2026 zanah an ṭhukhawm a; MizoTaxi application chungchanga sorkara an thu thlenin awmzia a neih loh chuan a tàwp thlenga dodal an rêl tih an puang.

Pawl pathumte hian, "STA-in March 2024 daih tawha rate min siamsak hmantir min la tum hi, hman chi-ah kan ngai lo," an ti a; rate àwm tâwka an ngaih sorkarah ziakin an thehlut niin a lang. MizoTaxi app ruahmannaah, taxi/auto hmangtute'n chhiah 6% - 10% an chawi zel a ngai dawn nia sawiin, "Taxi/auto fare kaltlanga mipuia chhiah a lak tur hi eng dan hmang a lak nge a ni tih kan hre thiam lo," an ti.

Taxi leh auto-rickshaw hman man (fare) hi March 2024-a siam niin a lang a, kum hnih chuang âwrh chauh a ni a, a la rei lo hle. Tuna rate tihpun leh nghal mai chu a la hun loah a ngaih theih; kum hnih danah fare rate tihpun a nih zel chuan, kalphung ṭha lo tak a ni ang.

Pawl pathumte'n MizoTaxi app hman vanga mipuiin chhiah 6% - 10% an chawi zel a ngai dawn nia an sawi hi mipui rilru hruai sual tumna niin a lang.

Khawpui lian zawkah chuan application behchhana lirthei mipuiin an hman theih a awm nual. Chungah chuan mipuiin hman man an pek aṭanga eng emaw zat chu app neitu (eg. Ola, Uber, etc) hnenah a lut ṭhin a, chu chu mipuiin chhiah an pe anga sawi a ni ngai lo.

MizoTaxi app-ah pawh taxi/autorickshaw ten app neitute hnenah pawisa an pe ve dawn tihna a ni a; hei hi khawpui dangah leh app danga tih ṭhin dan tho a ni. Mipuiin chhiah an chawi tur ang zawnga sawi a ni hi a zialo hle; mipui rilru kawng dik loa hruai tumna a ang. Thil eng eng emawah thil dik tâwk lo sawi a awm ṭhin a, chungte chuan mipuiah ngaihdan dik lo a siam ṭhin; hetiang hi a ṭha lo a, chìn fo loh a ṭha e.

Mihring phur sumdawnna lirthei neitute a àwm tâwka an hlâwkna tur ngaihtuah chungin mipui hmakhua ngaiin lirthei hman manah hian sorkarin thutlukna a siam tur a ni a, huaisen takin kal rawh se.