Cess sum ṭangkai taka hman ni se

Mizoram sorkarin petrol leh diesel aṭangin Road Maitenance Cess leh Social Infrastructure and Services Cess litre khatah Rs 2 ve ve zel a la a; September 2024-ah lak ṭan niin, cheng vaibelchhe tél a lut tawha sawi a ni.

Road Maitenance Cess sum chu kawng siamna atan hman tur a ni a, Social Infrastructure and Services Cess chu zirna, hriselna leh mihring chawikanna atan hman tur a ni thung.

Tuialhthei man vawi tam tak sorkar laipuiin a tisang tawh ṭhin a, tihsan chhan tam tak a awm ang. Sorkar laipuiin a tihsan hian Mizo mipui aṭangin sawiselna leh sorkar laipui demna thâwm hriat tur a awm mang lo. Sawisel phâk nia kan hriat loh vang leh kan sawiselin awmzia a nei loa kan hriat vang a ni mai thei.

State sorkarin tuialhthei man sàn belhna tura hma a lak erawh chuan mi tam takin an sawisel nghal chiam zel thung a; political party-te phei chuan sorkar demna ber pakhat atan an hmang. Kan sawisel phâk a nia kan hriat vang a nih a rinawm.

Tuialhtheia cess chi hnih lâk hi state tihhmasawnna atan hman tura tih a ni. Tun thleng chuan sorkarin mipui chhawr ṭangkai theih turin ṭangkai takin a hmang niin a lang a; chuta langsar tak chu kawngpui siam a ni.

Cess lak avangin tuialhthei manah sum sên belh mah ila, ram leh mipui hmasawnna atan hman a nih phawt chuan kan hlâwkpuiah ngai thei ila a ṭha hle. Mizorama tlawhpawh harsatna hmuna thawkte lirthei leina atan cess sum hman tum a nih thu tun hnaiah Health Minister-in a sawi a; hriselna lam tihhmasawnna tur a ni a, a chhawrtu tur chu mipui kan ni.

Tuialhthei aṭanga cess lak hi sorkar hian ṭha takin, ram leh mipuiin an hlâwkpui ngei turin hmang zel se. Cess lak hi politics-a inbeihna atan hman a la ni zelin a rinawm a; chu'ngte chu ménah thlâk thiam a ṭul.

Cess lak avanga tuialhthei man sang hi sorkar laipuiin a man a tihsan ai chuan Mizoramin a hlâwkpui zawk thei a, kan chhawr ṭangkai rang zawk a ni tih hi mipuiin rilru puthmang ni thei se. Uchuak taka cess lak emaw, mipuiin harsatna lian an tawh phahna khawp erawh a ṭha lo a; sorkar a fimkhur a, chintâwk neih thiam a ngai.