Lei laih khapna thupek zawm a ṭul

Aizawl Municipal Corporation chuan June 18, 2026 khan thupek a tichhuak a; fûr laia leimin vanga chhiatna thleng thei laka inven nan Aizawl huam chhungah kumin July 1 - October 31 chhungin lei laih leh a kaihhnawihte khap a nih thu a puang. Thupek bawhchhiate chu dan hmanga hrem theih an ni.

AMC-in July-October, thla li chhung Aizawlah lei laih leh a kaihhnawih thilte khap mah se, ṭul bik thilah chuan phalna dil theih a ni a, phalsak ngei tur erawh a ni lo. Ṭul bik thila dilna a awm chuan uluk taka enfiah hmasak tur a ni.

Mizoram hi tlang ram a ni a, lei a min fo a, leimin vangin chhiatna rapthlak tak tak, mi eng emaw zatin an thih phahna te pawh a thleng tawh ṭhin. Chutiang chu kan dinhmun a nih avangin, AMC-in fûr laia leimin vanga chhiatna thleng thei laka invên nan lei laih a khap rih hi a ṭha a, khapna thupek hi mi tinin kan zawm a ṭul.

Mizoram leh Aizawla leimin vanga chhiatna thleng tawhte thlirin, vanduaina vang liau liaua thleng a awm rualin, fimkhur loh leh ngaihsam vanga vanduaina kan tawn buak nia ngaih theihte pawh a awm nual tawh. Lei laih vanga thleng nia lang pawh eng emaw zat a awm tawh a ni.

Hun kal tawhte thlirin, fûr lai hi chuan lei laihah fimkhur zual hle a ngai tih a chiang a; fûr hmaa lei laihah pawh, fûr laia a awm dan tur leh thil thleng thei thlir tel chunga hmalak a pawimawh hle.

Lei laih khap thupek zawm ṭhat hian chhiatna laka min véng vek kher lo mai thei a, chutihrualin, eng emaw chen chu min vèn a rinawm. Chuvangin, chhiatna laka invenna atana lei laih khap rih hi a ṭha a, khapna thupek zawm hi mi tin mawhphurhna a ni. AMC-in lei laih khapna thupek a chhuah hi mi tinin ṭha taka kan zawm a ṭul.

Khapna thupek zâwm ṭha duh lo lui, phalna la si loa a rûka lei lai an awm cheu mai thei. AMC leh sorkara thuneitute'n zau zawka an mit an lèn a ṭul dawn, mipui lam pawhin thuneitute kan bengvàr ṭhin a ṭha ang. Thupek zâwm lo leh phalna la loa lei lai an awm chuan, dan ang taka hrem zel ni rawh se.