Exhaust pipe ring chi tihrêm a hun tawh

Lunglei Traffic Police chuan June 16, 2026 khan Lungleia two wheeler khu chhuahna (silencer/exhaust) ring chi an man sa eng emaw zat an tichhia a; thirchhia anga hralh zui niin, hralhna sumte chu sorkar sum báwmah chhûn luh a ni dawn. Lunglei Police hian kum hmasa lamah exhaust pipe ring chi an lo tichhe tawh ṭhin a ni.

Aizawl Traffic SP chuan January 2024 khan hriattirna chhuahin, two wheeler-a silencer/exhaust ring chi vuahte tihrêm an tum a, danin a phal chin aia ring tichhuakte chu Rs 10,000 chawitir theih a nih thu a sawi. Dan leh thupek bawhchhia hriate chu Traffic Control Room-ah hriattir turin a ngen.

Aizawl Traffic SP vêkin February 25, 2025 khan press mite hmaah, exhaust pipe ring chi vuahte lakah an khauh chhoh dawn thu a sawi bawk.

Silencer/exhaust ring chi tirêm turin police-te'n eng emaw chen chu hma an la ngei a, man pawh an nei nual tawh a, eng emaw zat an tichhe tawh. Chutihrualin, khawlaiah hmuh tur leh hriat tur a la tam êm avangin hma an lak dan tawh hi a la tâwk lo hle tih a lang.

Thuneitute'n sawi fo mah se, silencer/exhaust ri ring chi tihrêm tumna tak tak a awm lo em ni aw, a tih theih. Tum tak takna a awm chuan thil harsa lo tak a nih a rinawm; a chhan chu mita hmuh theih a nih bakah, benga hriat theih a ni. Tlân loh nía tlân chhuak lirthei registration number hmuh chat chat aiin, exhaust pipe ring chite hi hmuh a awlsam zawk viauin a rinawm.

Thupek chhuahah duhtâwk ringawt mai loin, two wheeler-a ri ring chi tirêm turin thuneitute'n chak lehzualin bawhzui tawh se, nasa zawkin ṭan la tawh rawh se. Tihrêm an tum tak tak phawt chuan an ti thei ngei ang. A pawimawh ber chu tumna tak tak a ni. Mipui lam pawhin dan bawhchhiate chu thuneitute hnenah hriattir nachang hriat a ṭul bawk.

Dan leh thupekte hi mipuiin zawm ṭhat a ṭul a; silencer/exhaust ring chi chungchanga dan leh thupekte hi ṭhalaite'n an zawm ṭhat a ṭul zual. Chak tak tak leh ring tak taka tlân ṭhinte hian mipuiin an ning hle a, mi tan harsatna an siam thei a ni tih hriat se, mâwl an ti tlangpui bawk tih pawh hria se a ṭha khawp mai.