Thisen vawi khata pek ṭeuh aiin pek ngun
AVBD leh MSACS huaihawtin June 17, 2026 khan Aizawlah World Blood Donor Day (June 14) hman a ni a, pawl anga thisen pe ṭhate hnenah chawimawina hlan a ni.
AVBD hian kum eng emaw zat kal ta aṭang khan pawl hminga thisen pe ṭhate hnenah chawimawina leh lawmman an lo hlan tawh ṭhin. Hei hian Mizo mipuiah leh pawl hrang hrangah rah ṭha a chhuah a nih a rinawm a, a thlawna thisen pek nasa takin a pung a, thisen petu pawl an pung zel bawk.
World Blood Donor Day hmannaah Health Minister-in, vawi khatah thisen pek ṭeuh aiin, donation camp huaisawt zin a ṭangkai zawk thu a sawi a; vawi khatah thisen pek ṭeuh tum lo a, zing zawka donation camp buatsaih tuma insiamrem turin pawl hrang hrang a ngen.
Health Minister ngenna hi pawl hrang hrangte'n a theih chin chinah zawm tum se a duhawm. Thisen hi chi thumah thliar a ni a, dam rei deuhte a awm rualin, ni 5 chauh dam pawh a awm. Ṭum khatah mi tam takin thisen an pek hian, thisen dam rei lote hman hman loha a thih (expire) theihna a inhawng zau bik ṭhin.
Tlawmngai taka thisen kan pekte a ṭangkai lehzual theih nan leh, ṭhenkhat a thih hman loh nan, thisen pek leh mamawh zat inphaman tâwk a pawimawh. Pawl hrang hrangte'n thisen pek tam kan duh em em karah hian, rilru zau tak kan put thiam a ngai.
Pawlte'n thisen an pek chhan hi lawmman dawn duh vang a ni lo a, chutihrualin, lawmman dawng thei khawpa thisen pek uar zel erawh a ṭha. Lawmman dawn duh vang ni loin, mamawhtu mi tam tak an awm avang zawkin thisen pek kan uar zel a ṭul.
Thisen pe thei lo nih hlauh vanga mahni nihna dik tak zêp an awm thei a; chutiang chu tih hauh loh tur a ni - thisen dawngtu tan a hlauhawm. Nihna leh dinhmun zêpa thisen kan pek hian, mi dangah natna ṭha lo tak kan thlen theih avangin, natna eng emaw neite chuan thisen pek ṭâlh tum loh ngam a ngai.
Mizoramah thisen dawn tur neih loh vanga thi an awm kan phal tur a ni lo. Thisen dawn tur awm loh vanga thi an awm loh nan pawlte leh mimalte'n thisen pek uar zel ila; thisen pe thei turin nunphung i uluk tlang ang u.