PAHOSS in sakte enfiah vat ni se

Gauhati High Court chuan Parking House Support Scheme (PAHOSS) ṭanpuina sum dawngtu, a taka hmang si lote aṭanga sum chhuh letsak theih dan tur kaihhruaina (guideline) siam turin Mizoram sorkar a hriattir.

PAHOSS chungchangah hian High Court-ah hian thubuai (petition) thehluh a ni lo a; Gauhati High Court Aizawl Bench-in kum 2022-a suo moto case a ziah luh kal zelin a kâng kai a ni.

PAHOSS hi February 6, 2019 khan khatihlaia Chief Minister-in a tlangzarh a; LMV pakhat hûnna (parking) atan Rs 1,00,000 leh two wheeler paruk zelah Rs 1,00,000 pekna tur a ni. Aizawla mi 139 hnenah in sakna atan cheng nuai 1,136 pek hman a ni.

PAHOSS hi garage siamna tur in sakna tur ni a lo a, parking tur in sakna tur a ni. A tum chu - chhûn lama khawpui chhunga chêt velnaa lirthei dahna (commercial parking) atan a ni a; chutihrualin, zan lamah garage anga hman theih a ni bawk.

PAHOSS hi a nih dan tur ang taka hman ni se chuan thil ṭha niin a hriat a, ṭanpuina dawn hmanga khawpui lailia in sa a, parking siam, ṭangkai taka mipuiin an hman zui tâk pawh a awm.

Chutihlaiin, ṭanpuina sum dawngtu zingah scheme-in a tum anga in sak zawh tawh hmang zui lo an awm nual niin a lang. Ṭhenkhat chu a awmna hmunin a zir loh vanga parking atana hman theih loh a ni a, parking atana hman zui tum lo hrim hrim an awm niin a lang bawk.

Sorkar pawhin âwm lo deuha ṭanpuina a pek nia ngaih theih a awm nual. Veng laili ni lo, khawpui daifém leh parking siam hranpa ngai lem loa ngaih hmuna in sakna atan sum tam tak pek a awm. Scheme duan a nih chhan nen a inmil tawh lo a, PAHOSS chhuanlama hmanga induhsakna vanga mimal in sakna atan sorkar sum inpekna a ni tawh zawk. Ṭanpuina dawngtute enin, mimal induhsakna atan an hmang a ang bawk.

High Court order hi sorkar hian chak taka bawhzuiin, PAHOSS hnuaia in sakte hi uluk takin enfiah se, in sak tawh a nih tur anga hmang lote zawng chhuak ngei rawh se. PAHOSS hnuaia in sak zinga a nih tur anga hmang lote chu ṭanpuina sum an dawn tawh chhuh lêt a nih theih nan sorkar hian Court thu hi chak takin bawhzui rawh se.