SIR atan smart phone hman ṭangkai

Mizoram Chief Electoral Officer (CEO) chuan tun hnaia Aizawl Press Club-a press conference a neihah, Electoral Roll Special Intensive Revision (SIR) 2026 neih mekah inthun luhna atan online mode - ECINET application hmang ṭangkai turin mipui a ngen.

SIR-ah hian tih dan pakhat zawk - BLO-te'n enumeration form (hard copy) an sem a, an lak khawm lehah chuan BLO-te'n portal-ah an thun (digitise) leh vek a ngai a, hna leh tih tur a tam viau. Voter-te'n mahnia Mizoram CEO website leh ECINET app hmanga an inthun luh erawh chuan BLO-te'n an buaipui zui a ngai lo thung.

ECINET app hi Google Playstore leh App Store aṭangin lak (download) mai theih a ni a; inthun luh a harsat loh bawk avangin Mizoram CEO chuan hmang ṭangkai turin Mizoram mipui a ngen a ni.

Mizo mipuiin smart phone kan hmang nasa tawh a, ṭhalaite'n an hmang nasa zual. Social media pawh ṭhalaite mai ni loin, nu leh pa, upa tak takte pawhin an khawih nasa tawh a; smart phone hmanna tam ber pawh social media a nih a rinawm.

Social media khawihna atana smart phone hman hi a ṭha a, chutihrualin, social media-ah hian thil ṭangkai leh hlâwk ti si loa intlakral theih tak a ni. Social media hrang hrang khawih thiam zinga tam tak chuan an tum phawt chuan thil dangte pawh an khawih thiam ngei ang.

Election thuneitute'n SIR 2026 neih mekah online hmanga mahnia inthun lut tura mipui min ngenna hi ngaih pawimawh a ṭha. Mi tam tak chuan an thiam a, an ti thei reng. Chutihlaiin, mi tam tak chuan SIR hi an ngaihsak lo a, mahnia inthun luh an tum lem lo a; chu chuan thil a tikhawmuang ṭhin a ni.

SIR enumeration form sem, voter-te dahkhahpui, lak khawm leh digitise te hi BLO-te hna a nih rualin, an tan a hautak avang leh an mawhphurhna a sân em avangin an hah hle. Mahniin online hmanga awlsam taka inthun luh mai theih a nih tho si avangin ECINET hi mipuiin hmang ṭangkai tum ṭheuh ila a duhawm. Electoral roll ennawnna SIR hi smart phone kan neihte ṭangkai lehzuala hman hun tak a ni e.