AMC-in ngaih pawimawh bik tur hria se

Aizawl Municipal Corporation-a corporator-te leh official-te chuan June 6, 2026 khan Tuiriala Solid Waste Management Centre leh Common Bio Medical Waste Treatment Plant te, New Market leh Reduce Reuse & Recycle Center te an tlawh.

AMC hotute'n Aizawl khawpui chhung leh dáia tun hnaia hmun pali an tlawh chungchanga thuchhuahah chuan, World Environment Day pualin corporator-te'n an ward ṭheuhah bawlhhlawh thliar chungchangah hma an la chhunzawm dawn tih a tel.

Hmun an tlawhnaah hian thawktute'n hna an thawh dante an lo hrilhfiah. Bawlhhlawh ṭawih thei aṭanga leiṭha siam dan te, bio-medical waste (damdawi lam bawlhhlawh) sâwngbâwl dan te, bawlhhlawh siam tlem a, hman nawn theih hman nawn a nih theihna tura hma an lak dante hrilhfiahin an lo entir a ni.

AMC hotute'n sorkar thar lak luh a nih hnu lawkah bawlhhlawh chungchanga hma an la nghal hi a lawmawm; bawlhhlawh paihna leh sâwngbâwlna hmunte an tlawh nghal hian thil ṭha zawk a hring chhuak ngei turah ngai ila.

Municipality-in subject a lak theih zawng zawng AMC hian a la la loa sawi a ni. AMC-a hotu ṭhenkhat chuan subject an khawih theih zawng zawng state sorkarin a pek an duh mai thei. Mahse, AMC-in an khawih theih chin an lâk vek a, an khawih vek hi AMC, Aizawl leh mipui tan a ṭha ber lo thei.

AMC-in subject a neih belh ai chuan, mawhphurhna neih tawh chinte hneh taka an thawh hi khawpui leh a chhunga chengte tan a ṭha zawk mahin a rinawm. AMC-in an tih tur chinte ṭha tak leh hneh taka an tih theih hi a pawimawh hmasa a ni.

Tuna AMC-in subject a neih tawh chinah hian ngaih pawimawh hmasak tur leh bawh nat bik tur hriat a ngai a; khawpui leh mipui tan awmzia nei pha tak tak si loa thil tih dúm ai chuan, insàwrbingna bik neih a ṭha zawk ang.

Bawlhhlawh thliar, paih leh sâwngbâwl lamah nasa zawka hmalak a ṭul a, khawpuiin a mamawh berte zinga mi a ni ang. AMC hian bawlhhlawh chungchang hi ngaih pawimawh bikah nei se, tun aia ṭha leh mumal zawka an tih theih chuan khawpui tan a hlâwk hle dawn a ni.