Sorkar hmalak zui dan mipuiin an thlir
Mizoram sorkara State Transport Authority (STA) chuan June 1, 2026 aṭangin Aizawl city bus din leh tlan danah pick & drop system hman a ni dawn a, city bus-te stand-ah ding reng loin, chuangte chhuk leh chuang turte lâwn chhung chauh an ding tawh dawn tih a puang. Mahse, a tir aṭangin city bus-te'n an zâwm lo a, stand-ah rei tak tak an la ding zel tho.
STA ruahmanna vêkin September 1, 2025 aṭangin thla hnih chhung city bus pick & drop system enchhin tura tih a ni. City bus-te'n September thla tìr lam ni rei lo te chhung zâwm mah se, a hnu lawkah an zâwm lo zui nghal a; sorkar aṭangin nawr zuina pawh a awm lo niin a lang.
July 1, 2026-a hman ṭan turin STA-in MizoTaxi application a duang chhuak a, taxi-te leh auto rickshaw-te chu June 2026 chhungin Rs 600 pea registration ti turin a hriattir. Mahse, auto rickshaw leh taxi-te'n an duh lo a, inziak lut lo turin an member-te an hriattir a ni.
Aizawl khawpui chhunga tlân mihring phur chi sumdawnna lirtheite kalphung atana STA ruahmannate hi mipui tan thil ṭha a ni a; mipui hma ngaia ruahmanna an siam hi a lawmawm. Mahse, a taka hman a nih loh avangin mipui tan hlâwkna leh ṭhatna a awm rih lo a, lawmna tur a la awm lo.
City bus-te stand-a an din dan tura ruahmanna thar leh MizoTaxi hmang tura tihna thupek/hriattirna te hi mipui náwlpui nghawng a ni a; thupek/hriattirna zawm loh leh dodalna hi sorkarin engtin nge a tih zui dawn tih mipuiin thlirin an ngaichâng mek a ni.
STA thupek leh hriattirna te hi mipui tana ṭha a ni a, MizoTaxi app phei chu sorkar thuchhuak ang taka taxi-te leh auto rickshaw hman man mipuiin an pek theihna tur a ni. Mipui tan a lawmawm em em a, sorkarin mipuiah beiseina a siam a ni.
Hriattirna leh thupek tihpuitlin a nih leh si loh chuan sorkar tan mualphona a ni dawn a, mipui tan a lungawithlak loh hle dawn a, mipui rilrua sorkar rin lohna siamtu a ni bawk ang. Chuvangin, sorkar hian ngun taka a ngaihtuah hnua thutlukna a siam tawh chu zawm a nih theih nan a bawhzui tur a ni a, huaisen takin kaltlangpui ngam ṭhin rawh se.