Red card-ah fimkhur leh fîr a ṭul dawn

Excise & Narcotics department (END) chuan June 2, 2026 khan hriattirna a tichhuak a; The Mizoram Liquor (Prohibition) Amendment Act, 2025 Section 45 B(1) tlawhchhanin, hriselna kaihhnawih vanga zu mamawhte tan zu kawl leh in phalna pek chhuah a nih dawn thu a puang. Zu pekna turin 'red card' siam a ni dawn.

END Commissionerate-ah leh district hrang hranga an pisaah red card dilna form lak theih a ni a, dilna form man Rs 50 a nih bakah, kum khatah Rs 5,000 chawi a ngai.

Hriselna kaihhnawiha zu mamawhte hnena zu pek theihna tur red card chungchang hian sawi zui a hlawh nghal hle a; politics-a inbeihna atan hman zui nghal a ni.

Red card chungchang hi mi tam takin an la hre chiang lo niin a lang. Tun hma aṭangin red card siam a lo ni tawh a, card nei mi eng emaw zat awm tawh ṭhinin, card hmangin END aṭangin zu an la (lei) ṭhin. Red card hi Mizoramah thil thar a ni lo.

Red card pek chhuah chhan - 'hriselna kaihhnawih' tih hi ngaihtuah tham tak a ni. Hriselna atan miin zu a mamawh tak zet em, tihah mipui ngaihdan a inang lo a, doctor-te chhan dan pawh a inang lo niin a lang.

Sorkarin tuna zu mamawhte hnenah zu pek chhuahna tur red card siam a nih dawh thu a puangzar thar leh hian eng nge a nghawng zel dawn tih a sawi lâwk theih loh a, hunin a la hrilh ang. Politics záwng pawhin nghawng nei thei khawp a ni thei a; sorkar lai party tan nghawng ṭha lo a nei a nih chuan a tuartu chu anmahni a ni ang.

Sorkar hian uluk taka a ngaihtuah hnu leh, a nghawng theih thil chi hrang hrang a thlir vek hnua a tih a ni ngeiin a rinawm. Hriselna atana zu mamawhte hmakhua ngaia an tih nia a lan rual hian, sorkar sum tuakna chi khata ngai an awm a nih pawhin, ngaihdan awm theih tak a ni.

Zu mamawh nia insawite'n zu an neih theihna tur red card hi fimkhur tak leh fîr taka buaipui a ngai dawn. 'Hriselna kaihhnawih' a nih avangin doctor-te hriatpuina (medical certificate) pawh a ngai ngei tur a ni a; doctor-te mawhphurhna a sang dawn a, an fimkhur hle a ngai dawn a ni.