Mizo hnam nihna hriat chian

Tun hnaiah UFC champion Zo hnahthlak pakhat USA aṭangin Mizoramah a rawn zin a, MISMA Fight Night-ah a inlan. Mi tam takin an lo lawm laiin, lo lawm ve thei lo, lo ngaithei vak lote pawh an awm àwm e.

Fight Night-ah hian British-in Zo hnahthlak peng hrang hrangte hming an phuah dan a dik lo niin Chief Minister-in a sawi a; Lushai, Chin leh Kuki tihte chu a dik tâwk lo tih sawiin, "Chhungkaw khat, thisena inzawm vek kan ni," a ti.

Zo hnam chungchang hi hriat chian a har a, a theih anga tam hriat erawh a ṭha. Hnam khat nihna hian mi a tipumkhat thei a, mi a hûi khawm thei; chhiat ṭhatah pawh hnam khat nihna hian rilru leh thinlungah awmzia a nei thûk viau. Khua, veng leh ram khat nihna pawhin mi a tipumkhat thei bawk.

Mizote hi hnamin nge ramin mi dangte min hnaihtir zawk tih inzawt ta ila, chhanna a inang lo ang. Rilru puthmang azirin chhànna a dang thei a, awmna hmun azirin a inang lo thei bawk. Chutihrualin, kan khua leh tui-pui (citizenship-pui) ai chuan kan hnampuite hi thinlungin a pawh zawk mah ṭhinin a hriat.

Ram dang (foreign)-ah chuan kan Indian-pui, vai kan tihte ai chuan, India ram mi tan foreigner pawh ni se, kan Zo hnahthlakpuite hi thinlungin a hnaih zawk ṭhin a, kan ngaina zawk fo. Hei hian thil tam tak a entir âwm e.

Ṭhenawm ram a buai avangin Zo hnahthlak foreigner ṭhahnem tak Mizoramah an rawn lut a, lo hrethiam viau mah ila, hun eng emaw ti aṭang khan ngaihtheih lohna a lian tih a hriat. Hei hi thil ṭha lo leh sualna chi hrang hrangah an inhnamhnawih ṭhina ngaihna vang a ni; a dikna lai a awm ang a, a dik vek lo thei bawk.

Zo hnamte hi ram hranga mi, khua leh tui nihna hrang nei ni mah ila, inhlat tak tak theih a ni lo - hnam nihna hian ken tel a neih tlat avangin. Mizo an ni emaw, hnam dang an ni emaw, ram dang mi an ni emaw, thil ṭha lo leh sual tite chu a mihring kan dem tur a ni a, thil sual titute hnampui leh ram mi-pui dangte vaihma veka hmuhmawh vek chi a ni lo. Hengte avang hian Mizo hnam nihna tak hi mi tinin a theih anga tam hriat a ṭul a ni.