CYMA ngenna leh kohhran fimkhurna tur

Central YMA hruaitute leh Mizoram Kohhran Hruaitute Committee hruaitute chu June 2, 2026 khan CYMA pisaah an inkâwm a; baptisma certificate leh lehkha pawimawh dang pek chhuahah fimkhur turin CYMA hruaitute chuan MKHC hruaitute an ngen.

CYMA leh MKHC hruaitute an inkâwm hi a lawmawm a, Mizoram leh hnam tan rah ṭha chhuah ngei se a duhawm. An theihna zâwn ve veah theihtawp chhuaha an ṭan rual chuan, ram leh hnam kal zel turah a ṭha zawngin nasa takin awmzia a nei ngei ang.

India, Manipur leh Myanmar-ah Mizo tam tak kan awm a, awlsam takin kan inkal pawh a, tam tak chu an lo pêm tawn tawh ṭhin. Tunah chuan India leh Myanmar chu ram hrang a nih tawh avangin, hnam khat ni mah ila, khua leh tui nihna (nationality) hrang nei kan ni tawh. Mizo vek ni mah ila, pian leh mûrna hrang ni ta chu rilru sûkthlêkah danglamna tam tak a awm.

Tun hnai kum tlemtê kal ta aṭang khan Mizoramah Myanmar lam mi an rawn lut nasa a, rufugee camp-ah tam tak an awm laiin, khua/veng chhunga in luahin tam tak an awm bawk. Citizenship hrang ni mah ila, hnam khat, ṭawng khat hmang na nâ nã chu, inthliar a harsat chin a awm a, kohhranah phei chuan inthliar a harsa lehzual àwm e.

Zo hnam, khua leh tui nihna hrang neite Mizorama kohhranah an tel a, an inhman ṭhat chuan kohhran mi leh sa anga ngaih mai a awl a, kohhran member-a ziah luh mai pawh awm thei a ni. Kohhran (denomination) member tam nih duhna vanga lak luh mai pawh a awm thei. Kohhranah ziah luh an nih tawh chuan, thil hrang hrangah khua leh tuite neih ang neih theihna kawng a inhawng tial tial thei a, chutiang chu an awm nual tawh mai thei bawk.

CYMA lamin lehkha pek chhuah chungchangah fimkhur tura MKHC a ngenna hi a pawimawh tak zet a, kohhran tinte'n ngai pawimawhin, fimkhur lehzual nan hmang rawh se. Kohhran hian ram leh hnam himna a ngai pawimawh tur a ni a; CYMA ngen angin, khua leh tui ni lote hnenah lehkha pawimawh pek a nih loh nan kohhrante an fimkhur hle a ṭul.