MizoTaxi leh lirthei hman man to
State Transport Authority chuan Aizawl khawpui chhunga mihring phur sumdawnna lirthei - four wheeler taxi, two wheeler taxi leh auto rickshaw-te tan MizoTaxi mobile application a siam thar a, MizoTaxi-ah pawisa chawia inziak lut vek turin taxi leh auto rickshaw te a hriattir.
STA ruahmanna hi taxi leh auto rickshaw pawlte'n an duh lo a, application chu hmang lo tur leh inziak lut lo turin an inhriattir. An duh loh chhante Transport Minister-ah an thlen a, inziah luh man kum khatah Rs 600 pek ngai tih chu an duh loh chhan niin a lang.
Mizoramah hian mihring phur chi sumdawnna lirtheite hman man a to hle. Taxi (ke li nei leh ke hnih nei) leh auto rickshaw ten sorkarin rate a bituk aia sang fé hman man an la ṭhin tih a chiang a; ṭhenkhat phei chuan rate bituk lêt chuang daih an la ṭhin.
STA-in hriattirna a chhuahah, "Passenger service vehicle hmang ṭhinte'n sorkar bituk ang tak lirthei chuan man an chawi theihna turin" tih a ni. MizoTaxi app siam chhan hi mipui tan a ṭha a, mipuiin rate dik tak an chawi theihna tura STA-in hma a la hi mi náwlpui tan a lawmawm tak zet.
Pawl pathumte'n MizoTaxi app hmang turin inziah luhna atan pawisa chawi a ngai hi an duh loh lai niin Transport Minister hnenah an thlen. Hei hi sorkar pawhin a ngaihtuah nawn a ṭha mai thei; fee chi hrang hrang an pek tawh hnua mobile app vanga kum tina pawisa chawi belh hi a na ve ang.
Chutihrualin, MizoTaxi app an duh loh chhan tak zawk chu - sorkarin rate a bituk aia sang, an duh ang zat zat passenger-te aṭanga pawisa an la thei lo tur nia lang hi a nih a rinawm riau; hei hi a dik chuan mipui tan chuan a huatthlala em em a, a thinrimthlak.
MizoTaxi hi hman a ni emaw, ni lo emaw, mihring phur sumdawnna lirtheite'n sorkar rate bituk aia sang fe an la ṭhin hi a dik lo tak zet a, mipuiin rate dik tak an pek theih nan sorkarin khawng taka hma a lak a ṭul. Taxi leh auto rickshaw neitu leh khalhtute pawh an inenfiah a ṭul a; permit petu, sumdawnna leh eizawnna siamsaktu sorkar thu an zâwm a, rate dik taka tlân hi an mawh a ni tih hre rawh se.