Zebra crossing leh dan zawm

Aizawl Traffic Police chuan June 1, 2026 aṭang khan Aizawlah kea kalte'n kawngpui an kânna tur bika siam zebra crossing-ah lirtheite an din loh nan khauh takin hma an la a, lirthei khalhtute pawhin an zawm ṭha hle niin a hriat a; a lawmawm.

Zebra crossing hi kea kalte'n kawngpui an kânna tura siam a ni a, zebra crossing-ah tak lirthei din phal a ni lo. Hun rei tak chu zebra crossing-ah lirthei din phal loh tih hian awmzia a nei lo tawh a; lirthei khalhtu tam ber chu zebra crossing-ah ding mai ṭhin.

Lirthei khalhtute'n zebra crossing nihphung an zawm theihna tura Traffic Police-in hma an la a, an kengkawh hi a ṭha hle. Hun a kal ang a, Traffic Police an khawng loh hun a la thleng leh ngei ang; chutih hunah pawh chuan tuna tih dan hi tih dan nghetah lirthei khalh ṭhinte'n an neih a ṭul dawn.

Zebra crossing chungchangah lirthei khalhtute kan thlùr viau lai hian, kea kalte pawhin mawhphurhna an nei. Zebra crossing hi lirthei khalhtute zawm tur bik ni loin, kea kalte pawhin an zawm tur, an hman ṭangkai tur a ni. Kea kalte'n mahni duhna hmun hmunah kawngpui kân mai loin, zebra crossing-ah ngei kawngpui kân ṭhin hi an mawh a ni.

Mizote hi inzirtirna leh inkaihhruaina ṭha a awm chuan thu âwih thei kan tak ni tih zebra crossing chungchanga hmalak mekna aṭang hian a lang thar leh. Lirthei khalh chungchanga dan dangte pawh tun aia nasa zawkin inzirtir ni se, Traffic Police lamin hma han la zel se a duhawm.

Tunlaia hmuh tur tam em em - lirthei khalh chunga mobile phone hman phal loh, exhaust pipe ring chi vuah phal loh tih leh thil dangahte pawh traffic police-te'n khauh zawkin hma la rawh se.

Inzirtirna leh inkaihhruaina ṭha hmanga tih vek theih loh chin a awm fo. Chuvangin, mipuiin dan an zawm ṭhat theihna tur chuan thuneitute'n dan an kenkawh ṭhat a pawimawh a, khauh zawka dan an lekkawh zel a ṭul.

Kawng tinrengah chhia leh ṭha hriatna hman a ngai ṭhin. Lirthei khalh danah hian thil namnûl mai mai zel lo a, chhia leh ṭha hriatna hman taimâk a ṭul a; mahni chauh inngaihtuah loin, mi dang i ngaichâng thiam ṭhin ang u.