SIR 2026-ah ṭan rual a ṭul

Electoral roll leh voter-te a bik taka ennawnna, Special Intensive Revision (SIR) of Electoral Rolls, 2026 chu Mizoramah pawh May 30, 2026 khan ṭan a ni ta. SIR-ah hian booth level officer (BLO)-te'n an bial chhung ṭheuhah chhungkaw tin tlawh chhuakin, electoral roll-a inziah luh dilna enumeration form an sem dawn a ni.

Enumeration form chu BLO-te'n June 28, 2026 thlengin an sem dawn a; a ṭul angin chhungkua/voter-te chu form an dahkhahpui dawn a; enumeration form dahkhah sa chu an la khawm leh dawn.

SIR-ah hian electoral roll-a awm tawhte pawh enumeration form-ah inziah luh vek a ngai. Roll-a la awm ngai lo, July 1, 2026-a kum 18 pumhlûm chin dah luh theih a ni a, Roll-a awm tawh sa, mitthi tawhte paih tur a ni.

Enumeration form-ah vote nei tawhte pawh ziah luh vek a ngaih avang leh, SIR zawhah chuan voter identity card hlui hmang tawh loin, voter ID card thar siam a ni dawna sawi a nih avangin SIR hi mi tinin kan ngaih pawimawh a ṭul.

State danga SIR tih tawhnaah Roll-a chuang ṭhin mi tam tak, a nuai tel paih an lo awm tawh a, chu chu political party-te'n inbeihna atan an hmang nasa. Mizoramah chuan sawisel tur awm lo tura dik taka SIR kalpui a nih a, Electoral Roll dik tak kan neih theih nan mi tinin SIR hi kan ngaih pawimawh a ngai.

SIR hi khua leh tui dik tak ni lo, Mizorama chêng ve mek site'n Electoral Roll-a inthunna remchangah hman an tum thei a, chutiang tura lo pui duhtu pawh an awm mai thei. Chutiang tih tumte chu kan do tlang tur a ni a; SIR neih mekah hian India khua leh tui ni lo chu thun an nih loh nan mi tin kan ṭan rual a ṭul a ni.

Electoral Roll ennawn mekah hian India khua leh tui dik tak, kum tling tawh zawng zawng thun an nih theih nan leh, khua leh tui dik tak ni lote thun an nih loh nan village/local level-a thawktu BLO-te leh thuneitu dangte an fimkhur tak zet a ngai. Official ringawtin an hriat loh chin a awm thei a, khawtlang hruaitute'n an thlâwp ṭhat a, an theihna apiangah BLO-te leh official dangte pui se a duhawm.