Sorkar hna leh pension tawh rawih

Tun hnaia Tourism department director mawhphurhna la tura Mizoram sorkarin sorkar hnathawk pension-a chhuak tawh a ruat chungchangin sawi a hlawh hle.

Sorkar hnathawk pension tawh rawih nawn leh chu MZP chuan dodalin, Tourism Directorate-a thawkte pisa kai tur ni thum chhung an dang. Director charge la tura tih chuan May 29-ah bânna a thehlut a, Chief Minister-in a pawm nghal a, MZP pawhin pisa dan an titawp ve nghal.

Mi ṭha leh thiamna bik nei an awm a, ṭangkaina tam tak an nei ṭhin a; sorkar tan te, khawtlang leh pawl tante an ṭangkai em em. Mahse, liam hun nei vek kan ni a, mi ṭha leh thiamte pawh an liam ve hun a awm; chutihrualin, an ai awhtu tur mi dang ṭha leh inpe tak tak an lo chhuak leh zel bawk. Mi pakhat avangin sorkar, kohhran leh pawlte hi a kalin a kal lo ngai lo.

Director chhuak ta kha mithiam, department tana thawh hlâwk tak, ram leh hnam pawhin hma a sâwnpui tak a ni mai thei a; la awm zel se, department leh ramin hma a sawnpui zui zel dawn pawh a ni mai thei. Mahse, amah avanga Tourism department hi awm leh kal a ni lo a, a awm tâk loh avanga hmasawnna ṭhuanawp tur pawh a ni lo.

Mi pakhat avanga sorkar, department, kohhran leh pawl te hi kal a nih loh rualin, ṭangkai bik, thawh hlâwk bik erawh a awm fo a; chutiang mite chu an chhuah a hunah an uiawm bik ṭhin. Sorkar hmalakna thilah chuan hman ṭangkai zui thiam pawh thil ṭha tak a ni àwm e.

Sorkar aṭanga pension tawhte hi sorkar hnathawk an ni tawh lo a, sorkar mi an ni tawh lo. Sorkar hnaah regular post chelh thei tawh lo tur ni àwm tak an ni. Sorkar aṭanga pension tawhte mithiam bik an nih avanga sorkarin a hmang ṭangkai zui duh a nih pawhin, regular post chelhtir loin, nihna phuahchawp deuh emaw siam mai hi tih dan tur ni àwm tak a ni. Chutihrualin, department hna kal lai leh thawktute tibuaitu, lài taka awmtirtu an nih theih avangin fimkhur a ṭha.

Tourism Director pawh hi regular post a nih angin, sorkar hnathawk, service lai ngeiin an luah tur ni àwm tak a ni a; department officer zingah la ni thei an awm lo a nih pawhin, sorkar hnathawk mek zingah mawhphurhna la tura dah/ruat theih an awm ngeiin a rinawm.