Nun dan ṭha inzirtir nasat a ṭul

May 26, 2026 zing khawvar hmain Aizawl khawpuia kawngpui lûn laiah tleirawl/tlangval insawisak rawnna a thleng. An inkhawih lai video social media-ah a darh chuai chuai a, mipuiin an dem rawn a ni.

Police-te rang takin an che a, mi kutthlak rawntu pangate chu May 26-ah vêk an man nghal. Mi panga zinga pathum chu jail-ah thawn an ni a, pahnih erawh chu kumtlinglo an nih avangin remand home-ah thawn an ni thung. Police-te rang taka an che a, mi kutthlak rawntute an man chhuak nghal hi a lawmawm a, an fakawm.

Kha insawisak rawnna video kha en mai chuan Mizorama thil thleng ni àwm loa mawi a ni; a rapthlak a, a pawi tak zet. Khatiang taka kum 18 tling chauhte leh kum pawh la tling lote an che duh khan ngaihtuah a tithui hle.

May 26, 2026 zing khawvar hmaa Aizawl khawlaia thil thleng kaihhnawihah hian Aizawl SP chuan buaina leh pawikhawihna a thlenin, police-te'n ṭha taka an bawhzui theih nan leh, pawikhawihtute an man thuai theih nan ERSS number 112-ah hriattir thuai turin mipui a ngen. Aizawp SP ngenna hi mipuiin hria ila, buaina leh pawikhawihna hmua hriate chuan 112 leh police station-ah hriattir vat zel a ṭha.

Mizoram Police an ṭang a, Aizawl khawpui chhungah zan lamah an kal kual ṭhin. Police-te an che chhuak ṭhin hi a lawmawm a, mipui tan a thlamuanthlak em em. Police-te hian theihtawp chhuah zui zel se, ngawrh lehzualin khawpui chhungte hi vil se, a ṭul angin duty-a che chhuak tur pawh tihbelh zel theih ni se a duhawm.

Police-te'n thlêr tin kil tin an véng séng lo a, chuvangin, khawtlang hruaitute'n khawtlang himna atan theihtawp an chhuah ve a ṭul. Kan khawtlang ṭheuh hi pawikhawihna hmunah a chan kan phal tur a ni lo a; khawtlang hruaitute'n tun aia nasaa hma lain, khawtlang ralmuang an neih ṭheuh theih nan ṭan la lehzual ṭheuh se.

Tleirawl leh ṭhalaite'n rilru dik an put a ngai a, ngaihtuahna leh rilru sûkthlêk dik leh changkâng zawk an put theih nan chhungkuaah nasa lehzuala inzirtir a pawimawh tak zet. Chhungkuaa puitling zawkte'n kan tu leh fate hnenah nun dan dik ngawrh lehzuala kan zirtir a ṭul e.