MPSC insiamṭha vat rawh se

MZP chuan May 23, 2026 khan Aizawl Press Club-ah press conference an nei a; Mizoram Animal Husbandry and Veterinary Service junior grade tur lakna MPSC-in a buaipuiah thil fel lo a awm ngeia an hriat thu an puang a; May 29, 2026 ral hmaa a bul atanga ti ṭha vek turin MPSC an phût.

MZP tarlan danin, MAHVS tur laknaah hian MPSC-in October 24, 2025-a valid list a tihchhuahah diltu mi 101 an awm a, mi 74-in exam an hmachhawn. April 27, 2026-ah written exam result a chhuak a, mi pali lak tur ni mah se, mi pathum chauh tihtlin an ni a, exam hmachhawntu mi 71 hnâwl an ni.

MAHVS atan mi pali lak turah personal interview pawh la thlen hma, written exam-ah lak tur zat aia tlem mi pathum chauh an tlin chungchangah hian MPSC lam chuan tih dik loh nei loah leh, dan anga dik taka ti-ah an inngai mai thei. MZP lam chuan MPSC thil tih dan dik loh vangah an puh thung.

Tun hnaia MPSC hi an che fuh lo fo mai. MCS (Combined Competitive) Examination 2025 an buatsaih, February 2, 2026-a result an tihchhuahah state páwn lam mi pakhat a tling. Páwn lam aṭanga nawrna a awm vang nia ngaih theihin result an siamṭha a, state páwn lam mi chu hnâwl zui a ni.

May 13, 2026-a MES (Combined Competitive) Examination 2025 result an tichhuak a, post sarih atan mi pariat an tling. MPSC-in an tihsual a ni tih pawmin, a tuk May 14-ah thupha chawina an tichhuak nghal. Heng bakah hian tihsual neuh neuh tun hnaiah an nei foa sawi a ni bawk.

MPSC-in tun hnaia thil an tihsualte hi fimkhurna hmanga vên theih, result tidanglam ngai lo leh exam hmachhawntute tibuai lutuk loa a hmaa chinfel theih vek niin a lang.

Tun hnaia tihsual an ngah lutuk hi a pawi hle a, rintlak an nihna titlahniam thei a ni. Sorkar hna laknaa rintlak ber tura ngaih MPSC-in an tisual fo a nih chuan mipuiin an ring ngam lo tial tial ngei dawn. Mipuiin an rin ngam theih nan, rintlaka an ngaih theih nan MPSC hi an insiamṭhat vat a ngai. State sorkar pawhin a ngaihvena a enfiah a ṭul a, thil dik lo awm anga langte hi a ṭul angin chhui se a ṭhain a rinawm.