Social media leh dan bawhchhiat

Mizoram Police chuan mipat hmeichhiatna ngialngan thawnthu phuaha YouTube-a dah ṭhin mi pahnih chu tun hnai, May 15 leh May 16 khan an man a, thubuai siamsakin, court thu angin jail-ah dah luh an ni.

Cyber Crime Police Station chuan YouTube-ah mipat hmeichhiatna ngialngan tak tak thawnthu Mizo ṭawnga phuah a, YouTube-a dah ṭhin an awm thu an dawng chu bawhzui nghalin, chutiang ti ṭhin channel pahnih siamtute chu an chhui chhuak nghal a ni. Police-te'n rang taka an bawhzui leh, pawi khawihtute an man chhuak nghal hi a lawmawm.

Mizoram Police chuan vaukhânna thu an tichhuak nghal a; social media leh online platform hrang hrangah mipat hmeichhiatna lam hawi thlalak, video leh thawnthu te thehdarh khap a nih thu leh, social media hmanga dan bawhchhiate chungah na taka action lak zel a nih dawn thu an tarlang.

Mipat hmeichhiatna lam hawi leh saruak thlalakte media chi hrang hrangah tihdarh phal a ni lo a; mahni taksa, mahni duhthu ngeia tihdarh pawh danin a khap. Danin a phal chin leh phal loh chin mi tinin kan hriat a ṭul a, kan hriat chu a taka kan zawm a pawimawh tel. Nasa lehzualin inzirtirna neih a ngai a ni.

Social media chungchangah inzirtirna a tam tawh hle chungin hmang sual an la awm zel. Mi tam takin dan bawhchhiaa an hman ṭhin chhan ber pakhat chu, sum duh luat vang niin a hriat a, lansarh leh lâr châk vang a nih a rinawm bawk.

Media zingah chanchinbu, radio leh TV lam hi chuan dan an zawm ṭha thawkhat niin a hriat a; dan bawhchhiatna tamna ber chu social media-te niin a lang. Hun lo la kal zel turah pawh dan bawhchhiatna a la awm zelin a rinawm.

Inzirtirna ringawt hi chuan awmze nei thamin mipui a tiharh tak tak dawn lo pawh a ni mai thei. Social media-ah dan bawhchhiatna a awm leh awm loh te, dan bawhchhiate man chhuah leh hrem an nih theihna tura hmalakna te a chak lehzual a ṭul.

Thuneitute'n social media-te hi vil ngawrh lehzual thei se; chumi tur chuan mamawh belh an nei nualin a rinawm. Police-te'n ṭha lehzuala social media-te an vil theih nan hmanraw ṭha leh thawktu pek belh turin sorkarin hma han la teh se.