Roll ennawn ngaih pawimawh a ṭul

Election Commission of India ruahmanna angin Mizoramah May 30, 2026 aṭangin a bik taka electoral roll leh voter ennawnna, Special Intensive Revision (SIR) neih a ni dawn. SIR hi thawh hnih neih a ni tawh a, tun ṭum hi a thawh thumna tur a ni.

SIR atan hian kumin May 30 aṭanga June 28 chhungin BLO-te in tinah kalin electoral roll-a hming chuang an endik dawn a; hei vang hian thuneitute chuan in lama hmuh theiha awm tum turin mi tin an ngen.

July 1, 2026-a kum 18 tling chin electoral roll-ah thun tur a ni a; July 5, 2026-ah draft electoral roll tlangzarh a ni ang a, draft roll-a sawisel duh nei tan July 5 aṭanga August 4, 2026 chhung hun hawn a ni dawn. September 6, 2026-ah final electoral roll tlangzarh a ni ang.

BLO-te'n an biala in tinah enumeration form an pe dawn a, chu chu chhungkaw tinin pe lêt leh tur a ni. Pek/lak let lohte chu draft electoral roll-ah an tel dawn lo a, final electoral roll-ah pawh tel zui a harsa mai thei. SIR tih zawhah voter identity card hlui hmang zui tawh loin, SIR behchhanin voter ID card thar siam a ni dawna sawi a ni bawk. Hengte avang hian SIR hi mi tinin ngaih pawimawh a ṭul.

State danga SIR tih tawhah sawisel neuh neuh a tam a, political party-te'n inbeih nan an hmang ṭhin. Party-te inbeihna hi a dik a awm thei a, a dik lote pawh a awm ang. Sawisel leh inbeihna a awm chhan lian tak chu, a hmaa electoral roll-a awm SIR-a paih tâk an tam vang a ni. Mi tam tak paih an nih chhan hi hriat chian ni lo mah se, mipuiin SIR an ngaihthah vang pawh a ni thei.

Electoral roll-a awm ngei turte paih an nih loh nan leh state dang anga sawisel a awm loh nan SIR hi mi tinin kan ngaih pawimawh a ṭul. Paih tur dik takte paih an nih theih nan leh thun tur dik takte thun an nih theih nan te, electoral roll-a chuang tur dik takte an chuan ngei theih nan mipuiin SIR hi kan ngaih pawimawh a ngai a; thawktute ṭha taka kan thawhpui a ṭul a ni.