Lirthei dan leh thupek bawhzui a ṭul

May 14, 2026 zanah Aizawla lirthei ke hnih neia chetsualna vangin nula pakhat a thi a; a hnuah lirthei ke hnih neiin naupang a su léng lawp lai thlalak social media-ah a darh bawk.

Nula pakhat thihnaa mawhphurtua puhte chu police-te'n an man tawh a, court-ah hruaiin, court thu angin jail-ah dah an ni. Police-te'n rang taka hma la a, nula thihnaa mawhphurtua puhte rang taka an man hi a lawmawm.

Nula pakhat thih phahnaa thil thlengah hian, video aṭanga a lan dan chu bike khalhtute an tlanna tur ni loah an tlan vang leh an fimkhur loh vang niin an lang a; two wheeler-in naupang pakhat a sutnaah pawh bike khalhtu a thiam loah a ngaih theih. Thil thleng pahnihah hian mipuiin bike khalhtute an dem viau niin a hriat.

Tun hnaiah lirthei khalh fimkhur loh vanga nula pakhat a thi leh naupang pakhat na taka a hliam hi a pawi a, a tuartu chungkuate tan a na hle ang. Fimkhur loh vanga lirtheia chetsualna a thleng fo tawh a, a la thleng zel mai thei. Fimkhur loh vanga lirtheia chetsualna leh thihna a thlen tawh loh nan mi tin fimkhur a ṭul tak zet.

Lirtheia chetsualna a thlen lohna tur hian lirthei kaihhnawih dante leh lirthei khalh dan ningkhâwngte hriat chian a pawimawh. Lirthei tlân vel a thâwl a nih pawhin, tlan chak phal chin bithliah a awm tih hriat a, chu chu zawm ngei a ṭha. Ṭha taka dan zawm a nih chuan lirtheia chetsualna leh chumi vanga thihna thleng tam tak chu pumpelh a nih a rinawm.

Mi tam tak chuan traffic police duty an awm loh chuan dan ang loin lirthei a khalh theih taah an ngai emaw tih turin, traffic rules bawhchhiaa tlân an chíng a; a him lo hle. Traffic police an awm loh avangin dan zâwm loin tlan phal a ni tihna a ni lo a, duty awm loh vangin fimkhur zual a hun chiah zawk.

Sorkara thuneitute leh police-te pawh lirthei chungchangah khauh lehzuala hma an lak a ṭul. Lirthei chungchanga dan awm sate leh thupek tihchhuahte hi a ṭha taka bawhzui a ni lo fo a; chu chuan mipuiah inthlahdah rilru a siam ṭhin. Lirtheia chetsualna a tlem zawk theih nan dan leh thupek awm sate hi thuneitute'n ṭha takin bawhzui rawh se.