Eiruk thubuai chak taka bawhzui ni se

Khawzawl leh Ngaizawl inkar kawng laihnaah eirûkna a awma sawi a ni a, Mizorama minister hlui leh speaker hlui pakhat chu inhnamhnawihah puh a ni. Hemi chungchang hian sawi zui a hlawh hle.

Speaker/minister hlui eirua puhnaah hian Anti Corruption Bureau chuan Prevention of Corruption Act, 1988 Section 13(2) tlawhchhanin August 5, 2024 khan thubuai an ziak lut. ACB hian an chhui zo khat tawh a; an dil angin sorkar pawhin Governor remtihnain court-a chargesheet thehluh phalna April 23, 2026 khan a pe. Thubuai kal zel dan tur chu Lokayukta kutah a innghat rih.

Eirukna leh hlemhletnaa speaker/minister hlui inhnamhnawiha puhna thubuai hi mi tam takin an ngaihven hle. Social media-ah phei chuan sawi zui a hlawh em em a, ṭawngkam chhe tak taka sawi zuina (comment) hmuh tur pawh a tam.

Speaker/minister hlui hi tunah chuan 'puh' a la ni chauh tih kan hriat a ṭha. ACB-in an chhui tawhna hi a dik emaw, dik lo emaw pawh ni se, court-ah finfiah a nih hma chuan thu tling a la ni lo. Chuvangin, huai tak taka sawi chiam te, ṭawngkam chhe tak tak hman te hi a ṭha lem lo a, insúm rih thei ila a ṭha.

He thubuai hi cheng nuai tam tak tichingpena inpuhna a ni a, a lian viau. Eirua puh hian a eiru ngei a nih chuan dan ang taka hrem a nih theih nan leh, puh a nihnaah a fihlim a nih chuan a fihlimzia finfiah a nih theih nan theihtawp an chhuah zui a ṭul. He eirukna thubuaiah hian dikna a dinchan ngei theih nan a chhuitute'n chak takin bawhzui zel rawh se.

Kan ramah hian corruption case a kal muang ṭhin a, thubuai kal muang hi dikna a lal theih loh phah cháng pawh a awm mai thei. Tun aia corruption case a kal chak lehzual theih nan mawhphurhna neite'n an ngaih pawimawh a, an ṭan lehzual a ngai.

Kan ram, Kristian ramah hian pawikhawihtua puh, a bikin eirûk thubuai neite hrem an ni ngai loa ngaihna mipui rilruah a lian niin a hriat. Hetiang zawnga mi tam takin ngaihdan an nei hi siamṭhat a ṭul a, siamṭha tur chuan eiruk thubuaiin a kaihhnawih zawng zawngte an ṭan lehzual a ngai a ni.