Nurse-te taima lehzualin thawk se

May 12 kha International Nurses Day a ni a, Mizoram hmun hrang hrangah hman a ni. Nurses Day-ah hian Tuichawnga health worker Lalenthangi Hnamte chuan India President hnen aṭangin India rama nurse chawimawina sang ber Florence Nightingale Award a dawng.

Kumina Nurses Day thupui chu 'Our nurses. Our future. Empowered nurses save lives' tih a ni. Damlo thei vek kan ni a, kan damloha min enkawtu tam berte chu nurse-te an ni a, mi tin tan an pawimawh em em.

Nurses Day thupui ang hian, nurse-te'n hma an sawn a, ṭha lehzuala damlote an enkawl theih nan tihchak an pawimawh. An thawhna hmuna thuneitute'n nurse-te tichak leh tiphûr zawnga hma an lak a, an phu tâwk hamṭhatna lam ngaihtuah zel a ṭha. Anmahni pawh an intihchak a, an thiamna leh theihna an tihpun zel a ṭul bawk.

Mizoramah hna thawh ṭhat vanga nurse chawimawina sang ber dawng thei mi 18 an awm tawh a, Mizoram pawna thawk zingah mi pahnihin an dawng tawh bawka sawi a ni. Kuminah dawng an awm leh hi a lawmawm a, award dawngtu a chhuanawm a, amahah entawn tur tam tak a awm ngei ang.

Profession-ah chuan nursing hi Mizote ṭhat berna a ni hial mai thei. Mizo nurse-te an ṭha a, an thiam a, an taimain an inpe hlawm em em. Chutihrualin, thatchhia leh thawk ṭha peih lo te, damlote vin chíng takte pawh eng emaw zat an awm ang.

Kumina Florence Nightingale Award dawngtua zir tur leh entawn tlak awm apiangte nurse dang zawng zawngte'n entawn hreh lo se. Award dawng ve tlak khawpa thawh tum ṭheuh se, ram leh hnam tan an hlu lehzual ang. Chutihrualin, award hi dawn vek theih a ni lo a; award dawn aia ropui zawk chu damlote enkawltu leh damna thlentu an nihna hi a ni.

Nursing-ah hian thiamna leh taimakna a pawimawh em em rualin, nungchang a pawimawh a, zaidam leh dawhtheih a ngai. Zaidam lo leh dawhtheihna nei ṭha lo, mi vin khur khur ching chuan damlote rilru natna a siam a, rilru natna chuan taksa natnaah nghawng a nei thei.

Hengte hi hre rengin, Mizo nurse-te kawng engkima fimkhur chungin taima lehzualin thawk se; nurse hna hi eizawnna ni mai loin, Pathian leh mihringte tana rawngbawlna a ni tih an vawn reng a ngai a ni.