Sorkar hnathawk rawih nawn

Mizoram sorkar chuan April 30, 2026-a superanuation pension-a chhuak Tourism Director chu a pension hnuah pawh Director ni zui zel rih turin a ti a; Tourism Director bakah mawphurhna pek sa OSD to Chief Minister pawh ni zui zel turin a ti bawk.

Tourism Director atan leh OSD to CM atana sorkar hnathawk pension tawh dah a ni hi MZP chuan duh loin, May 14, 2026 ral hmaa sût turin sorkar an ngen.

Hetihlai hian, Mizoram Tourism Service Association leh Tourism Staff Welfare Association chuan, an Director rawih nawn (re-employed) a ni chu lawmawm an tih thu leh, rawih nawn a nih theih nan sorkar hotute an lo ngen tawh thu an tarlang.

MZP-in sorkar hnathawk pension tawh rawih nawn duh loa an dodal ṭhin hi a àwm em em. An duh loh chhan chu - sorkar hna zawngte sorkar hnaa an luh theihna dâltua an ngaih vang a ni. Zirlaite leh ṭhalaite hmakhua an ngaih vang tih a hriat a, hetiang rilru an pú hi a lawmawm.

Tourism Director rawih nawn a nih chhan chu - director ni thei an awm rih loh vang a ni a; rawih nawn hun chhung pawh, Joint Director-in seniority-ah director a kai theih hun thleng a nia sawi a ni.

Director rawih nawn a nih chhan ngaihtuahin, sorkarin a ruai nawn hi a àwm viauah a ngaih ve theih tho bawk. A chhan chu, Director hi ruai nawn lo se, Tourism department chu director nei loin an awm rih dawn tihna a ni a; director an neih loh chuan, department hmalakna leh hna hrang hrangin a tuar theiin a rinawm.

Thil kal tluang pangngaiah chuan sorkar hnathawk pension tawh rawih nawn a ṭha loah a ngaih theih a, mihring induhsakna vang a nih phei chuan a ṭha lo lehzual. Inrawih nawn a ṭhat loh rualin, officer thiam bik leh tawnhriat nei ṭhate mamawhna bik erawh a awm thei a, sorkar, ram leh hnam tana a ṭhat zawk cháng a awm thei ang.

Ram leh hnam tana ṭha turah chuan sorkar hi huaisen takin kal zel se; Tourism Director rawih nawn hi kaltlangpui a tum a nih chuan MZP hruaitute nen indawr se, thil nih dan leh a ṭul dante chiang taka inhrilhfiah a ngai a ni.