Hna thawh turah fimkhur a ṭul
Mizoram Police leh Rudrapur Police te chuan May 5, 2026 khan Uttarakhand state-a Rudrapur khuaa Beauty Queen Salon & Spa luhchhuahin, Mizo hmeichhia panga tâng mekte an chhan chhuak a, hmeichhia panga zingah kum tling lo pahnih an tel.
Mizo hmeichhia chhan chhuah tâkte hi May 9 khan Mizoram thlenpui an ni. Police-te chuan Salon & Spa-a Mizo nulate inzawrh luihtirtua puh mi paruk an man nghal a; an man zingah hian Mizo hmeichhia pakhat a tel.
Phai lama pawikhawihna rapthlak taka tángte Mizoram Police leh Uttarakhand Police ten an chhan chhuak hi a lawmawm a; kan police-te an fakawmin, an inpekna leh thawhrimna a chhuan-awm tak zet.
Pawikhawihtute hi dan anga na taka hrem an nih theih nan Mizoram Police-in theihtawp han chhuah zel se. An chungah Mizoram mipuiin beiseina sang tak an nei a, mipui beiseina hi a takin tihlawhtling thei ngei se a duhawm.
Phai lama Mizo nulate inzawrhtir tura bum an ni hi a pawi em em a, a thinrimthlak. A bumtute zingah Mizo hmeichhia a tel leh zel hi a pawi tak zet a, a zahthlak tel bawk.
Hetianga Mizo hmeichhiate mipat hmeichhiatnaa inzawrhtir tura bum chhuah an nih chhan hi sum duh vang a nih ngei a rinawm. Sum duh luatah Mizo hmeichhiate tawrhtir an pawiti lo a, sum duh vangin hnam dang thurualpuiin, dan loa thil tih, pawikhawihna leh sualna rapthlak tak tih an pawiti lo tihna a ni.
Tun hma aṭangin Mizoram páwna hna thawk tura inthawnnaah inbumna a lo awm tawh ṭhin a, mi tam takin harsatna an lo tâwk tawh. Inbumna hi tun thlengin a la awm tih a chiang. Rudrapur-a thil thleng hi a runthlak em em a, chutihrualin, inzir fin nan kan hman a, kan fimkhur lehzual a hun tawh. Rudrapur-a Mizo nula ṭhenkhatte vanduaina hian Mizote kan fimkhur a ngaihzia min zirtir thar se a duhawm.
Mizoram páwna hna thawk turin fimkhur a ngaihzia te, hna thawhna tur hmun a him leh him loh hriat hmasak a ṭulzia te vawi tam tak sawi a ni tawh. Fimkhur a ngaihzia an sawi ṭhinte hi ngaih pawimawh a hun a; ṭhalaite an fimkhur a ṭul rualin, nu leh pate pawhin an fimkhurpui a ṭul hle a ni.