Manifesto tipuitling ngei rawh se
Aizawl Municipal Corporation term linaa sorkar thar chu May 7, 2026 khan lâk luh a ni a; Aizawl District Magistrate-in corporator zawng zawng rinawmna thu a tiamtir bakah, Mayor, Deputy Mayor leh executive corporator-te rinawmna thu a tiamtir.
Thla hnih chuang AMC sorkar a awm loh hnuah sorkar thar a ding ta hi a lawmawm a, AMC-in mawhphurhna leh tih tur chi hrang hrang a neihah mumal leh tluang takin, chak zawkin hna a kal thei tawh dawn a ni.
AMC sorkar lak luh zawhah thuthar theh-darhtute'n Aizawl Mayor thar an kâwm a; Mayor chuan, AMC sorkar thar chuan inthlan dawna an party manifesto an dah pawimawh hmasak dawn thu a sawi.
Inthlan rêng rêngah hian political party-te'n an tih turte an ziahna, manifesto an nei a, chumi hmang chuan mipuiah an inzuar ṭhin a, mipuia an intiamna a ni. Manifesto-ah hian thil ṭha leh tih tur ṭha an hriat chi hrang hrangte an dah ṭhin a, thil ṭha lo a awm ngai meuh lo. Kan buaina ṭhin zawk chu - manifesto bawhzui ṭhat loh leh tihpuitlin loh ṭhin hi a ni.
Aizawl Mayor tharin an party manifesto an ngaih pawimawh hmasak tur thu a sawi hi a ṭha a, a lawmawm. Manifesto hi an inzawrhna leh mipui hnena an intiamna a nih angin, bawhzui ṭhat a ṭul rêng a; an sorkar tirh aṭang hian manifesto tinzâwna hma lain, an hun chhunga tipuitling ngei turin thawk nghal rawh se.
Tuna AMC sorkar hian an manifesto an tipuitling a nih ngat chuan Aizawl khawpui hian nasa takin hma a sawn phahin a rinawm. Aizawla chêng mipui mai bakah, khaw danga mite thlengin a hlâwkna an tél dawn tihna a ni a; a lawmawm hle dawn. Hruaitu ṭha tak, khawpui enkawltu ṭha takah mipuiin an ngaih phah ngei bawk ang. Chutiang tur chuan tun aṭangin ṭan an lâk a, theihtawp an chhuah nghal a ngai.
AMC kaihruai tura thlan tlin zawng zawngte'n rinawmna thu an tiam ang ngeiin an mawhphurhna ṭheuhte rinawm tak leh dik taka an hlen chhuah a ṭul a; sorkarna chelhtu, nihna pawimawh zual chelhtute an rinawm pawimawh lehzual. Candidate-a dahtu party lakah leh anmahni thlangtu mipui lakah an rinawm a ṭul bawk.