Zirnaa hmasawn tura ṭanrual

Tun April thla tawp lama MBSE-in school exam result a tichhuah chungchangah Education Minister-in thuchah a tichhuak a; nu leh pate chu an fate zirna ngaihsak deuh deuh tur leh, Mizoram tana mi chhenfâkawm chher chhuak tura theihtawp chhuah turin a ngên.

Education Minister-in Mizorama nu leh pate a ngenna hi a pawimawh hle. Mizoram zirnain hma a sawn zel theih nan leh, Mizo zingah thiamna sang zawk neia hlawhtlinna ropui tak tak nei tam zawk an chhuah theih nan mi tinin tih theih kan nei. Mahni hmazawn leh tih theihna ṭheuhah theihtawp chhuah tlân a ṭul a; chutah chuan zirlai nu leh pate hi a pawimawh berte zinga mi an ni.

Zirnaah a ni emaw, thil dang dangah pawh ni se, zirlaite leh ṭhalaite an hlawhtlin theihna tur chuan chhungkuaa inzirtirna ṭha neih a ngai. Nu leh pa leh chhungte mawhphurhna a sang zual a, an mawhphurhna an hriat a, chhungkaw tinah tu leh fate ngaihsak lehzual a ṭul ang.

Nu leh pate'n an fate an tuina zawng an hriat a, an fuih phûr thiam a pawimawh. Tu leh fate hi duat tur a ni a, duat sual theih an ni tih erawh hriat reng a ṭha a, fimkhur tak chunga duat dan tâwk hriat a ngai.

Mihring hi thunun ngai kan ni a, tu leh fate hi duat chungin thunun an ngaihnaah thunun ngam a ṭul. An awh zawng leh an duh apiang pek loh ngam a ngai a, an duh an sawite tihsak hmain an tana ṭha tur leh ṭha lo tur ngaihtuah hmasak a ṭha.

Mizoram zirnain hma a sawn theih nan sorkar, sikul leh zirtirtute'n mawhphurhna sang tak an nei a, tih tur tam tak an nei. Chung an mawhphurhnate chu an hriat chian a, zirlaite hmakhua ngai chung leh, ram leh hnam hmasawnna tur ngaihtuah chunga tih tur takah hma an lak chat chat a pawimawh.

Khawtlang hruaitute'n mawhphurhna an nei ve bawk. Khawtlangah zirna boruak ṭha siam a pawimawh a, zirlaite tibuai thei zawnga khawtlanga thil tih tam loh a pawimawh. Mahni khawtlang ṭheuhah khawtlang anga tih tur hrang hrangah zirlaite âwl thiam a ngai a; fuih phûr zawngin, khawtlangin a tih theih ang angah puih ṭhin ni se a ṭangkai hle ang.