RTI Act leh thup chin neih

Mizoram Universal Healthcare Scheme chungchanga Mizoram State Healthcare Society leh Synod Hospital inremna thuthlung (agreement) RTI Act hmanga dil leh sorkar lamin an pek chhuah theih loh chungchangin sawi a hlawh viau.

Society leh Synod Hospital inremna thuthlung hi mi pakhatin RTI Act-in a dil a, pek a ni lo. Diltu chu lungawi loin Chief Information Commissioner-ah a zualko a, Commissioner chuan pe chhuak turin Society a hriattir. Commissioner order chu Society chuan High Court-ah a khing a; Court chuan Commissioner order chu a titawp lailâwk (stay) ta rih.

Inremna thuthlung pek chhuah loh chhan nia sawi chu, MUHCS chungchanga inremnaah thurûk vawnna (confidentiality) tur zeh a nih vang nia sawi a ni a; hei hi Synod Hospital nena inremnaah chauh ni loin, private hospital dangte nena inremnaah pawh a tel veka sawi a ni.

MUHCS hi sorkar/mipui sum hmanna a ni a, chumi vanga inremna thuthlung pek diltuin pek a phût tlat leh, CIC-ah a zualko hi thlirna pakhatah chuan a àwm viau mai thei. A lehlam záwng aṭanga thlir chuan, thil àwm lo leh pek chhuah loh theih niin a lang bawk.

RTI Act hmanga sorkara information dil hian third party an awm chuan third party remtihna a ngai. MUHCS leh private hospital inremna pawh third party awm a nih avangin information pe chhuak tur chuan third party remtihna lak ngei ang. MUHCS aṭanga damdawi-in aṭanga bill lut zat, damlo zat leh sum pek zat te erawh chu dil chhuah theih a ni ang.

RTI Act hre chiang ber tura ngaih CIC-in third party-in an remtihna awm lo leh, MSHCS hotute leh information diltu a kohnaa third party ko tel loa thutlukna a siam mai tem information pe tura thupek a chhuah mai hi a mak hle. Nghawng a nei thui ta viau a, High Court hial a thleng a, a zialo hle a ni.

RTI Act hi sorkara thil hriat duhte leh document mamawhte dil chhuah theihna ṭha tak a ni. Chutihrualin, sorkar/mipui sum hmanna pawh ni se, RTI Act hmangin thil zawng zawng dil chhuah theih a ni lo. A bik takin ram himna tibuai thei thil leh mi/pawl (third party) nihna leh dinhmun (privacy) hai lan theihna chungchangah 'theih loh' chin a awm tih mipuiin kan hriat tlan a ṭha e.