Thlan tlintea mipui beiseina

Aizawl Municipal Corporation inthlanpuia vote tlate chu chhiar a ni ta a, sorkarna siam tur pawh hriat a ni ta. AMC inthlan leh vote chhiar te thluang taka neih a ni hi a lawmawm a, political party te, candidate-te leh anmahni puitu te, inthlan leh vote chhiar buaipuitute zawng zawng inpekna leh thawhrimna a fakawm.

Municipal inthlan hi MLA inthlan leh VC/LC inthlan ang em em chuan mipuiin an ngai pawimawh tawk lo niin a hriat a; chuti chu ni mah se, a nep lo a, a pawimawh em em. Political party-te leh candidate-te pawh an ṭang em em a, vote chhiar a ni meuh chuan boruak pawh a nei liamn leh viau tho.

Inthlanah tlin vek theih a ni lo a, tling leh tling lo an awm ṭhin. Tun ṭumah pawh thlan tlin chu mi 19 an ni mai a, tling zo lo mi 49 an awm. Tlin leh tlin loh te, chak leh chak loh te hi thiam hrâm hrâm a ṭha a, mihring mizia leh nihna tak tak lan chhuahna a ni fo.

AMC inthlana thlan tlinte'n lawm dan tâwk an hriat a a ṭha a, chapo loh te pawh a pawimawh; tling zo ve lote tana hriat nuam lo lutuk tura ṭawngkam neih loh leh chêt loh a mawi. Tling zo ta lote pawhin awm dan tâwk, a mawi tâwk an hriat a ṭha hle bawk.

Aizawl khawpui enkawltu tur corporator-te leh sorkarna chelhtu tur a chiang ta. Tunah chuan sorkarna siam turte'n inthlan hmaa an intiamna leh inzawrhna ang taka hma an lak a, hna an thawh chho a pawimawh tawh a; inthlan hmaa an intiam ang ngeia hmalaka hna thawh chu an tihmâkmawh a ni.

Inthlan dawnah sorkar siam huna tih tur sawi zul a, tihlawhtling ṭha leh si lote hi an ngeiawm ṭhin a, rinawm lohna lantirtu a ni. AMC-a sorkar siam tur, thuneihna changtu turte hian an intiamnate an hre reng tur a ni a, tihhlawhtlin ngei tumin theihtawp an chhuah zui tur a ni.

AMC corporator ni tura thlan tlinte hian anmahniah mipuiin beisei sang tak an nei a, chumi avang chuan mipuiin an thlang tling a ni tih an hriat reng a ṭul a, mipui an tibeidawng tur a ni lo.