Rorelnaa hmeichhe tana hmun hauh

Women’s Reservation Bill tia hriat, Nari Shakti Vandan Adhiniyam tia sawi bawk 106th Amendment Act, 2023 chu April 16-17, 2026 khan Lok Sabha-ah sawiho a nih hnuah a tlang zo lo. Bill hi thlâwptu tam zawk mah se, hmun thuma 2/3 an tlin loh avangin a tlang zo lo.

India ramah Women Reservation Bill chungchangin sawi a hlawh a, political party leh mipui zingah ngaihdan a inang lo viau niin a lang. Mizoramah pawh politics leh ram rorelna chungchang ngaihven deuhte chuan an sawi zui viau.

BJP National Spokesperson chuan April 24, 2026 khan Aizawlah press conference koin, Women’s Reservation Bill-a an ngaihdan a sawi. Eptu party ṭhenkhatin Women’s Reservation Bill hnâwltute chu hmeichhiate hmasawnna tur dodaltute an nih thute a sawi hial a; Bill chu sorkarin la put luh leh ngei a tum thu a sawi bawk.

Bill hnâwltu political party-te chuan BJP leh an thurualpuite chu hmeichhiate duhsakna tak tak vang ni loin, Women Reservation Bill hmanga politics khelah an puh thunga sawi a ni.

Women Reservation Bill hi Parliament leh state assembly-a hmeichhiate tana seat 33% hauhsakna tur a ni. Ngaihdan a inang lo viau thei a, Mizo zingah pawh ṭha ti leh ṭha ti lo an tam hlein a rinawm. Ṭhatna leh ṭhat lohna sawi tur a awm ṭeuh ve ve ang.

Mizorama inthlan awm tawh thlirin, hmeichhia, politics khel a, inthlan chuhtute hi mipuiin an iai lem lo niin a lang thei. State assembly leh municipal inthlanah phei chuan reservation tel loa inthlan chuh tawh Mizo hmeichhiate hi an tling zel zawk a ni.

Mizoramah hian Parliament leh state assembly-ah hmeichhiate tan seat hauhsak bithliah a awm emaw, awm lo emaw, legislator ni tur hian ram leh hnam tana inpekna, tumna leh ṭhahnemngaihna a pawimawh hmasa hriat a ngai.

Reservation vanga hmeichhiate politics-a nawr luh ringawt hi hmeichhe chawikânna a ni chiah em tih hi ngaihtuah theih tak a ni. Ram leh hnam tan a ṭha lo zawk thei a, anmahni tan pawh a ṭha lo zawk theiin a rinawm. Thil hrang hrang thlirin, Mizo hmeichhiate hian an tum chuan an ti thei zel tih a hriat a, ram rawngbawlnaah pawh hian duhna leh tumna an neih hmasak a ngai a ni.