Zirlai fail vekna sikul en zui a ṭul
MBSE chuan April 23, 2026 khan HSLC Examination 2026 result an tichhuak a, zirlai exam 18,257 zinga 14,663 an hlawhtling a, pass percentage 80.31% a ni. Pass percentage hi nikum (76.68%) aiin a sang zawk.
MBSE-in HSLC result an tichhuak thuai hi a lawmawm. Result buaipuitute an thawkrim hle ang tih a rin theih a, an inpekna leh thawhrimna a fakawm. Pass percentage pawh a sang a, zirlaite'n an tih ṭhat vang a ni turah ngai ila; a lawmawm.
Tun hma deuh khan MBSE hi mark ren lutuka sawi a ni ṭhin a, state dangah mark an ren ve loh avangin state páwna zirna chhunzawm turte'n admission-ah harsatna an tawh phah ṭhina sawi a ni. Mark hi a àwm tâwkah chuan ren loh thiam a ṭha a, chutihrualin, páwng ren loh viau erawh a ṭha chuang lo ang.
Nikumah sorkar sikula pass percentage 68.01 a nih laiin, kuminah chuan 72.07% a ni. Education Minister chuan "Kan result hian zirlaite tan govt school a belh tlak tih a rawn tarlang," a ti. HSLC result-ah hian sorkar sikulte'n hma an sawn tih a lang a, a lawmawm. Tun aia result ṭha zawk nei thei tur leh, zirlaite leh Mizoram mipuiin sorkar sikulte hi zirna tlak tak taka an ngaih leh theih nan sorkar, department, sikul leh zirtirtute'n ṭan la zel rawh se.
HSLC 2026-ah hian hlawhtling zo lo zirlai 3,477 an awm a, compartmental chance nei zirlai 117 an awm bawk. Zirlai hlawhtling zo ve lote hian hrehawm an ti hle ang tih a rinawm.
Exam-a pass loh hi hringnuna hlawhchhamna a la ni lo a, beidawn phahna tur a ni lo. Beidawng loa bei ṭâng ṭâng ṭhinte chu an hlawhtling nge nge ṭhin tih hriain, tumruhna neih phah nan hman zawk tur a ni. Zirlai fail-te hi nu leh pa leh chhungte'n hau mai loin, an thlamuan a, an fuih phûr a ṭul a ni.
Zirlai exam zawng zawng an hlawhchham vekna sikul 13 lai a la awm a, a zialo. Sikul dinhmunin a zir lo hrim hrim a ni thei a, zirtirtute inthlahdah vang leh chhan dang vangte pawh a ni thei ang. Harsatna an neihte sutkian dan zawn ngei a ngai a; zirlai pass nei lo sikulte hi thuneitute'n a chhan hriat tumin an dinhmun zir chiang ngei rawh se.