Sorkar ram humhalh ṭhat a ngai e

Zuangtuiah Industrial Estate a awm a, thil siamna din duhte'n industry an bunna hmun tura tih a ni. Industry eng emaw zat din ni ve bawk mah se, tunah chuan Estate chhungah mimal in a ding nual tawha sawi a ni.

Tuna Ainawn Veng tih tâk hi sorkar ram a ni a, Govt Complex tih a ni. Sorkarin quarters eng emaw zat a sa a, sorkar hnathawk eng emaw zat an chêng ṭhin. Sorkar quarters-te chu a him tawh loh avangin eng emaw zat ṭhiah a ni tawh a, ṭhiah hmabak a la awm bawk niin an sawi.

Govt Complex hi sorkar ram ni mah se, mi eng emaw zatin an in tur an sa a, mimal in a din belh zel a, tunah chuan Aizawla veng lian pangngai tak a ni tawh. Sorkar ram a nih miau avangin mimal in satute' n in an sakna hmun/ramah dan angin ram neitu nihna an nei loa sawi a ni.

Ram pass (LSC, etc.) nei lo mah se, an taneih tawh a, mi ṭhenkhat phei chuan mi dang hnenah an hralh ṭhen a; an ram ni miah lo, sorkar ram chu mi dang hnena hralh an awma sawi a ni bawk.

Govt Complex ni ṭhin, tuna Ainawn Veng tih tâka awmte hi sorkar tan nawr chhuah ngam an ni tawh kher lo ang. Nawr chhuah ngam an nih loh rau rau chuan, LSC siamsak law law ni se, dan angin sorkarah chhiah pe ve se a ṭha tawh zawkin a rinawm. A theih phei chuan LSC siamsakte chu ram hlutna chhût chhuakin, khultir ni se a ṭha ang em? Sorkarin ngun taka ngaihtuah chungin hma la zui se.

Sakawrtuichhun thlanga Luangmual ramah Industrial Growth Centre a awm a, sorkar ram niin, industry dinna tura tih tho a ni. IGC chhungah hian mimal in saa chhungkuaa awm an awm leh nual tawha sawi a ni a, Industry Veng Kohhran (Presbyterian) pawh a ding tawh.

IGC-ah hian mimal in a din zel loh nan sorkarin tun aṭanga a vena a humhalh ṭhat hle a ngai. Tun aṭanga humhalh tlat a nih loh chuan Aizawl hmun danga mimalin sorkar ram an luah khah zui tâk ang thoin mi an luh belh zelin a rinawm. Sorkar hian tun aṭangin dan anga khauh taka a vên him a ṭul a ni.