AMC roll ennawn dan ennawn a ṭul

Aizawl Municipal Corporation inthlanpui vawi lina vote thlâk chu harsatna lian tham awm loin tluang taka zawh a ni ta a, a lawmawm. Vote tla percentage 62.77% niin, AMC inthlana vote tlak chhiat ber ṭum a ni a, inthlan hmasate aia a hniamna erawh a tam lutuk lo. AMC inthlan hi state assembly inthlan angin mipuiin an ngai pawimawh tâwk lo tih a lang.

Vote tlate April 27, 2026-ah chhiar a ni dawn a, candicdate mi 68 zingah tling leh tling lo an awm ngei dawn a, political party zingah sorkarna siam thei leh siam thei lo an awmin a rinawm. Tling zo lo leh chak ta lo ten mi dang mawhpuhna tur zawn tum phêt loin, an inpawm thiam a ṭul dawn a; chu chu mi puitling zia a ni. Chak lohna hi mahni inenfiah nan hman thiam a ṭha.

Tun ṭum AMC inthlana langsar tak pakhat chu - vote neia inngaia vote thlâk tuma kal, AMC electoral roll-ah an awm si loh vanga vote thlâk thei ta lo mi eng emaw zat an awm kha a ni. Vote thlâk ngai pawimawha vote thlâk tuma an kal kha a hlu em em a, vote an thlâk thei ta lo erawh a zialo tak zet a, an khawngaihthlak hle.

Aizawla chêng, vote nei theite'n AMC inthlanah vote an thlâk vek theih nan State Election Commission-in hma a lak a ṭul tih a lang. Electoral roll ennawn danah fuh tawk lo lai a awm a ni thei a; fel lo leh fuh lo laite zawn chuah a, Aizawla vote nei thei zawng zawng AMC electoral roll-ah an awm vek ngei theih nan SEC-in a bawhzui a ngai.

Vote thlâk tuma kal, AMC electoral roll-a lo awm si lote hi MLA leh MP inthlana vote thlâk tawhte an ni tlangpuiin a lang. MLA/MP inthlannaa hman electoral roll leh AMC electoral roll hi a hrang a ni tih hre lo, MLA/MP electoral roll-a awm vanga AMC electoral roll-a awm tura inngaite an nih a rinawm.

AMC electoral roll-a awm lote hian inthlan tur puala electoral roll ennawn kha an lo ngaihsak tâwk lo a ni thei a; tun hnuah chuan electoral roll hrang hlak a ni tih hriain, electoral roll ennawn leh hunah inthun ngei tum se a ṭha hle ang.