Aizawl hmasawnna tur ngaihtuah ila

Aizawl Municipal Corporation inthlanpui vawi lina chu vawiinah neih a ni dawn ta. Aizawl mipuite'n kan pawimawh ní, roreltu ṭha leh ṭha lo thlang tura keimahnia mawhphurhna a awm ní a ni tih hriain, vote kan thlak ṭheuh a pawimawh.

Municipal (AMC) hi mi ṭhenkhat chuan a pawimawh dan tak kan hre tâwk lo a ni mai thei. A pawimawh dan leh khawpui tana a ṭangkaina te kan hre vek lo a nih pawhin, a pawimawh a ni tih hi pawm phawt mai ila. Vawiina AMC inthlan pawh hi Aizawl khawpui hma lam hun thui tak hril thei a nih avangin ngaihtuahna fîm tak nen vote thlak a ṭha hle.

Mizoram pum a ni emaw, municipal huap a ni emaw, village/local council ang pawh ni se, ram, hnam leh khawtlang hmasawnna turin hruaitute an pawimawh em em rualin, mipui kutah thui tak a innghat, a chhan chu mipuiin an vote hmangin hruaitu tur an an thlan vang a ni.

AMC inthlanah hian veng chhung mi duhsakna a lian fo a, veng inpawhna pawh a awm ṭhin niin a lang. Veng mi duhsak viau hi a ṭhatna a awm rualin, a ṭhat lohna pawh a awm ve thei àwm e.

Kan veng mi tling se kan duhsak viau hi a àwm em em a; chutihrualin, kan veng mi ngei kan duhsaka te chu an tling a nih pawhin, kan veng chauh an duhsak erawh a rem dawn lo. Kan veng an ngaihsak ang thoin kan ward chhunga veng dang, veng ṭhenawmte pawh an ngaihsak tel a ngai tih hriat a pawimawh.

Mahni veng chauh ngaihsak viau a, ward chhunga veng dangte ngaihsak ṭha si lo chu corporator ṭha an ni thei lo. Chuvangin, kan veng tan chauh ni lo, kan ward pumpui tan leh Aizawl khawpui tana ṭha tur thlan thiam a pawimawh.

AMC inthlanah hian mipuite'n party manifesto-te leh candidate-te dinhmun ngaihtuah chunga vote kan thlak a ngai. Kan bial (ward) mai piah lamah, Aizawl khawpui tana ṭha tur ngaihtuah peih mi, mi dik leh rinawm, sum ûm chi ni lo thlan tlin ngei tumin vote i thlak ang u.