Silent period zâwm tlang ila

Aizawl Municipal Corporation inthlanpui vawi lina a hnai ta hle a, naktukah vote thlâk a ni dawn. Inthlan atana campaign hun pawh nimin tlai dar 5 khan a tàwp tawh a, tunah chuan campaign phal a ni tawh lo.

Naktuk Thawhlehni hi AMC inthlan vote thlâk hun a ni a, zing dar 7 aṭanga tlai dar 5 thleng vote thlâk hun hawn a ni dawn. Vote thlâk hun bithliah chhunga vote thlâk hman ngei turin inruahman ṭheuh ila a ṭha hle ang.

Vote thlâk hun tàwp (tlai dar 5) aṭanga chhiar lêta darkar 48 chhung chu silent period tih a ni a, campaign rêng rêng phal a ni tawh lo. AMC inthlan turah hian nimin tlai dar 5 khan silent period a inṭan. Campaign hian media chi tin a huam a, SMS/message, ṭawng leh thlalak/video thawn darhte pawh a huam vek.

Inthlanah campaign phal loh chin siam a nih chhan chu, inthlanna thianghlim, felfai leh ralmuang a awm theih nan a ni. Silent period hi Representation of People Act Section 126(1)(b) tlawhchhana tih a ni a; Parliament leh state assembly inthlanah chauh ni loin, tualchhung inthlanah pawh hman zel a ni. He dan bawhchhiate chu dan anga hrem theih an ni.

AMC inthlan turah tunah hian campaign phal a nih tawh loh avangin, political party mi te, candidate-te leh anmahni puitute an campaign tawh tur a ni lo; hei hi mi tinin kan hriat chian a ngai.

Campaign phal tawh loh hi danin a phût a ni a, campaign lui an la awm a nih chuan dan an bawhchhia tihna a ni. Dan bawhchhiat hreh lote chu ram leh hnam, khawtlang tan hruaitu ṭha leh rinawm an ni kher loin a rinawm.

Media changkang zel avangin campaign theih dan chi hrang hrang a tam tawh a, candidate-te leh party mite campaign dan pawh tun hmaa tih ṭhin dan aṭangin a danglam hret hret. Hetiang a nih avang hian inthlan dan bawhchhiatna thleng tur ven sên a ni lo tih erawh hre tel ila.

Silent period bawhchhiatna a awm loh nan candidate leh an awmna party mite an fimkhur a pawimawh ber a; dan bawhchhiat duh lohna rilru an put a ṭul. Silent period bawhchhiaa social media emaw vela la campaign chiam chiam an awm chuan, mipuiin ngaihdan tâwk nei thiam ila a ṭha phian ang.