Nau chunga thihna leh a chhuina

March 12, 2026 khan Zobawk khuaa nu pakhat chu nau chungah a thi a, social media hrang hrangah mipui sawi zui a hlawh hle. He thil thleng hian mi tam tak thin a tirim a, Civil Hospital, Lungleia thawkte mipuiin an dem rawn a; Health Minister pawhin thuphá a chawi hial.

Zobawk nu pakhat, nau chunga thihna chungchang hi chhui turin magisterial inquiry din a ni. Inquiry chungchangah hian Health & Family Welfare department chuan March 19, 2026 khan hriattirna tichhuakin, chhuitu atan Lunglei Additional DC a ruat.

March 20, 2026-ah order dang chhuak lehin, magisterial inquiry ti turin Lunglei DLAO/DTO ruat a ni leh a, kar khat chhung hun pek a ni. Chhui hun chhung tura ruat chu March 27 khan a tawp a; hun pek chhungin a chhui zo hman nge hman lo tih hriat theih a la ni lo.

Zobawk nu chunga thil thlen dan nia tarlante thlirin, Civil Hospital, Lungleia thawkte an inthlahdah a, an tih tur an ti loa ngaihna mipui rilruah a lian hle niin a lang a; mipui pawhin an dem hle niin a lang.

Lunglei Civil Hospital hian Zobawk nu hi lo enkawl nghal ni ta se, a nunna an chhan mai thei a, an chhan lo thei bawk. An lo enkawl nghal mai si loh avang leh, a hnu lawkah nau a cheh a, nu a thih tâk si avangin damdawi-in hi dem loh theih a ni lo.

Damdawi-inah thawktute inthlahdah vang nia ngaih theiha inentirte leh damlote laka thil ṭha lo thleng a lo awm tawh ṭhin a, thihna hial thleng ta pawh a awm tawh ṭhin. Chutiangah chuan mawhphurtu hrem tâk pawh an awm tawh ṭhin a; chutih rualin, mawhphurtu hum tumna a awm ṭhin nia ngaihna mipui rilruah a lian niin a hriat.

Thil dik lo tihna emaw, thawktute inthlahdahna emaw a awm a nih chuan inhum tum loin, thil dik lo titu hrem ngei an nih theih nan hmalak zui ni ṭhin se a ṭha.

Zobawk nu chunga thil thlengah hian, a chhuituin àwn lam nei loin, dik takin a chhui ngei tur a ni a; report pawh huaisen taka ziakin, sorkarah an thehlut tur a ni. Chutih rualin, tu emaw thiam loh chantir tum râna hmalak erawh a dik chuang lo. Hrem ngai an awm a nih chuan, a tuartu tur dik takin an tawrh theih nan bawhzui zel ni rawh se.