Swap & Save ngaihven tlang ila

Urban Development and Poverty Alleviation (UDPA) department leh Swachh Bharat Mission (Urban) chuan March 9, 2026 aṭang khan Aizawl leh district khawpuiahte Swap and Save a kalpui ṭan a, UDPA Secretary-in a hawng.

Swap and Save hi sikul uniform leh zirlaibu hluihlâwn tawhte dah khawmna leh a mamawhte'n a thlawna an lo lak theihna tur a ni a; March 9-21, 2026 chhungin Aizawl leh district headquarters-ahte kalpui a ni dawn a, Aizawlah chuan centre pariat siam a ni.

Swap & Save centre-te chu NULM hnuaia self help group member-te'n an vil dawn; SHG-te hian an awmna veng chhungah sikul naupangte uniform, zirlaibu leh bungraw dangte an khawn khawm dawn a ni.

UDPA department leh SBM (Urban) ten chhungkaw khawsak harsa zawka zirlaite remchang siamsaka Swap & Save a buatsaih hi a lawmawm a, UDPA hminga 'poverty alleviation' (retheihna ûm bo) tih nen pawh a inhmeh hle.

UDPA-ah hian 'urban develop-ment' (khawpui tihhmasawn) lama hmalakna a langsar a, mipui pawhin kan hriat tam a ni a, poverty alleviation lama hmalakna hriar tur a tam lo. Chutiang karah chuan poverty alleviation lama UDPA department hmalakna hriat tur a awm hi an tih tur tak, an tih àwm tak a ni a, department hminga tel thlap a ni bawk a, a lawmawm hle a ni.

Swap & Save hi khawsak harsa zawkte chhawmdawlna tinzawna hmalakna a nih angin, chhungkaw rethei zawka zirlaite'n an chhawr ṭangkai ngei theih nan hlawhtling ngei se a duhawm. Chutiang tur chuan zirlaibu, uniform leh zirlaite mamawh thil dang hluihlâwn tawh neite an chêt chhuah a ngai.

Sikul uniform, zirlaibu leh zirlaite mamawh thil dang hluihlâwn tawh neite'n Swap & Save hi ngaihven tlang ila; bungraw hlui, bawlhhlawh anga paih mai turte theh khawm nachang hria ila. Hre lo tam tak an awm thei a, mi tam zawkin an hriat theih nan inhrilh darh zel a pawimawh. Zirlaibu leh uniform leina tur nei remchang lote pawhin Swap & Save-a thil dahte lak hreh lo ila a duhawm.