Kawlphetha la luh lohna khuate hi
Mizoramah kawlphetha la luh lohna khaw 45 a awm a, Power & Electricity department-a division 11-ah transformer chhia 71 a awm mek bawk tih tun hnai khan Assembly session-ah Power & Electricity Minister-in a sawi.
PE Minister sawi danin, Mizorama electric current la luh lohna khua (un-electrified village) 45-ah electric hrui thlun luh tum a ni a, chumi atan chuan hna thawktu tur contractor pathum thlan a ni tawh. Kawlphetha pekna atan sum a awm tawh a, bungraw mamawhte pawh pek (supply) ṭan tawh a ni.
Kawlphetha la luh lohna khua 45 lai a la awm hi Mizoram chhungah hmasawnna hnathawh a rualkhai lohzia lantirtu a nihna lai a awm. Kawlphetha pek dawng ve ngei se an duhsakawm a, sorkarin kawlphetha pek tuma hma a lak mekna hi chak zawka kalpui theih ni se.
Electric current la luh lohna khuate hi Mizoram khawtlang lama awm deuh vek a ni a, hnam tenau leh tlêm zawkte chênna a ni hlawm. Khaw lian lo tak tak a ni deuh vek a, tam tak chu khaw thar deuhte pawh a ni hlawmin a lang.
Mizoramah khaw tereuhtê tê, a ṭhen chu khua tia chhiar tham ni meuh lo thlenga a awm ṭeuh hi sorkar tan a buaithlakna tam tak a awm a, sorkar tan harsatna tam tak a siam ṭhin.
Khua a din tawh chuan a chhunga chêng mipuiin mamawh chi hrang hrang an nei a, khua leh tui an nih ve tho si chuan mipui mamawh zualpuite chu sorkarin a ngaihtuahsak a ngai si. Chu tak chu sorkar tan tih vek a harsa ṭhin a ni.
Kawlphetha la luh lohna khuate hi dan loa khaw din an ni em tihte en chian a ṭul; dan loa khaw din an nih phei chuan ṭhiah a, khuaa chêngte sawn chhuah a, khaw pangngai deuh zawkah awm khawmtir ni se. Khaw pakhatah mipui tam zawk an awm theih chuan ni tin mamawh hrang hrang pek a awlsam zawk ngei ang.
Mizorama electric transformer tam tak chu a hlui tawh hle a, chuvang chuan chhiat cháng a awm foa sawi a ni. Minister-in Power & Electricity department-a division 11-ah transformer chhia 71 a awm mek thu a sawi hi siamṭhat emaw, a thara thlâk emaw thuai a nih theih nan sorkar hian chak takin hma a lak a ngai a ni.