High Court thu leh PAHOSS

Gauhati High Court chuan kum 2019-2023 chhunga Mizoram sorkarin a kalpui Parking House Support Scheme (PAHOSS) hnuaia ṭanpuina sum pek chhuah zat te, ṭanpuina dawngtu zawng zawngte hming te, ṭanpuina sum hmanga in sak an hman zui dan leh thil pawimawh dangte Gauhati High Court-ah thehlut turin Mizoram sorkar a hriattir.

PAHOSS hi sorkarin Aizawl khawpuia lirthei hûnna (parking) a tam zawk theihna tura in sa turte a ṭanpuina scheme a ni a, MNF-in sorkarna an chelh laia kalpui a ni. December 2023 aṭanga ZPM-in sorkarna an chan hnuah erawh chuan kalpui a ni tawh lo.

PAHOSS-ah hian in sak ṭanpuina atan cheng nuai 6,139 ruahman a ni. September 21, 2023 dinhmun ang chuan, ṭanpuina dawng turin mi 403 thlan an ni a, ṭanpuina dawng tura inremna ziahpui zat chu mi 201 an ni. Mi 140 hnenah first instalment cheng nuai 890 pek a ni a, mi 47 hnenah second instalment nuai 200.60 leh mi 11 hnenah third/final instalment nuai 34.20 pek a ni bawk.

High Court-in thubuai a ngaihtuah hi PAHOSS thubuai a ni chiah lo a, Aizawla in pakhata motor parking awm lo vanga harsatna thleng kaihhnawiha thubuai lut a ni. Thubuai hi motor parking chungchang a nih avang leh, PAHOSS pawh motor parking siamna tur scheme a nih avangin High Court hian PAHOSS hmanga hmalakna leh a nghawngte a hre duh niin a lang.

High Court thupek hi Mizoram sorkar, a bikin PAHOSS nodal department UDPA-in ṭha tak leh chak takin bawhzui se, PAHOSS chungchanga dinhmun dik tak, zêp leh thup awm loin, a nih dan dik takin High Court-ah an thehlut ngei a ṭul.

PAHOSS hnuaiah in sak ṭanpui pek chhuah a lo ni tawh a, pek chhuah tawh chu lak lêt leh a remchang tawh lo ang. A scheme hrim hrim sawisel chiam hun pawh a ni tawh lo. Tunah chuan PAHOSS ṭanpuina sum dawngtute'n in an sakte a nih dan tur ang taka an hman hi a pawimawh ber tawh a; hei hi an tih ngei ngei tur a ni.

PAHOSS sum hmanga in satute'n an in sakte lirthei dahna (parking) atan an hmang ngei em tih kimchang taka endik ni se, parking atana hman lo an awm a nih chuan a ṭul angin action lak ni rawh se.